ViuTV收視五月見真章 大台完全唔心慌

Browse By

成日聽人講娛樂圈大染缸,風光背後個個明星都只係普通人,做完訪問會同大家吹水「打邊爐」,今日開始我Polly姐正式登陸呢度,同大家八盡娛樂圈大小事,跑過娛樂又跑過港聞,PR公司又做過,呢個「大染缸」有咩未見過呢?

香港人睇電視終於有「選擇」,亞視四月一日停播之後,模擬頻譜同數碼頻譜分別由港台同ViuTV接手,後者亦都終於在星期三正式啟播。其實《太陽的後裔》早於ViuTV App同韓國隔四個鐘頭播,昨晚韓國在播第13集,ViuTV先播配音版第一集,論配音同無綫差好遠,仲有啲「亞視味」;不過眼見ViuTV每日進步,昨晚起劇集更有繁體字幕,可見誠意十足。

ViuTV同無綫昨晚率先公佈收視,有公關好友就主動爆料,話無綫黃金時段平均收視全線跌近四點,《Do姐有問題》跌到最厲害,由26點跌到19點左右,跌近七點有多;至於新處境劇《愛.回家之八時入席》就由27點跌到23點,同樣唔見四點;另外兩部電視劇《末代御醫》同《EU超時任務》都唔見四點,前者由22點跌到18點,後者就26點跌到22點;咪以為大台眼見四點收視白白唔見咗,會開始慌,有朋友就話其實一班高層完全唔驚,更主動放風話星期三黃金時段收視一向都會跌少少,點解跌就自己諗啦。

無綫突然消失四點收視,夜晚ViuTV亦都主動公佈收視,指《太陽的後裔》同《帶著矛盾去旅行》最高有八點收視,平均就有五點收視,對比亞視「零收視」,已經交足功課,有朋友就話其實ViuTV現時未有收視數據,五點同八點全部都係計算無綫當時流失嘅收視率,再推算觀眾轉去ViuTV而計算出來,所以真正收視率要等到五月初先有,要見真章分分鐘大家要等到五月呀。Polly姐 上

Leave a Reply

Your email address will not be published. Required fields are marked *

%d bloggers like this: