【中港矛盾】新城市廣場涉大陸團優先參觀 惹港人不滿

Browse By

befdd710b0e4cd12d7929029fe390efa

(圖片:新城市廣場)

星期六下午時份,網友Man Seung打算帶孫兒去沙田新城市廣場的Thomas & Friends的展覽遊玩。大約下午2時15分左右打算進場時,有職員告知事主將會有記者採訪,要封場。着他們去另一邊排隊,去到隊尾時又有職員叫他們15分鐘後再來排隊,怕記者採訪會將他們攝入鏡。事主與其他家長頓感奇怪,記者採訪理應想將熱鬧的情況拍入鏡內。事主再次詢問職員有關詳情,惟職員不予理會。後來,事主見突然有大量家長和小朋友湧入場內,貌似一個旅行團多於一個所謂的「記者採訪」。事主遂向商場推廣部查詢,職員黃小姐強調場內絕對是一個記者採訪。事主就質疑為何那批人士身上沒有掛上採訪證,而且又有大量小朋友摻雜其中。職員只是一直支吾以對,似乎是在拖延時間。

其後一個同樣正在排隊的婆婆發現場內人士正在拿起寫有「深圳跨境學童家長會慶六一國際兒童節」的橫額拍攝團體照。事主上前拍下他們手持的橫額,一名場內的男士隨即走上前「問候」事主。在場的香港人看不過眼向男子表示如果他動手打人必定會報警處理,該男子同行的伙伴立刻上前把男子拉開。與此同時管理新城市廣場的新鴻基地產職員向事主解釋道場內人士來自一個傳媒組織,隨後又指是一家內地的報館。詢眾要求下職員向場內人士拿了一張卡片,卡片是一個內地電視台的職員。當他們被問有否記者證時,場內無一回答。

事主Man Seung非常感慨,認為香港人享用香港本土的商場設施不期望能夠享有任何特權。偏偏一個來自內地的「團」竟能享有「特事特辦」的權利,而且要用「記者採訪」等藉口作掩飾。事主將過程拍攝成短片,上載至社交網站facebook,着網民分享開去。

3190_tc

有關展覽之活動海報

「以為偉大的全國人大委員長張德江到港要封路,點知連大陸旅行團都同我地既特首一樣,地位超然,令到新鴻基管理既沙田新城市廣場都要對佢地「特事特辦」。。。
事源沙田新城市廣場有一個thomas展覽,本人就打算帶同孫仔去映下相玩下,14:15打算入去玩時,有職員告知將會有記者來採訪,要封場叫我們到後面 去排隊,到咗後邊又有職員叫我地唔好系呢度排隊,費事一間記者來採訪影到你地,跟住叫我地15分鐘之後先好再返嚟排隊,我同其他一齊係到排隊等候嘅媽媽就 覺得個職員咁講野好奇怪,記者來採訪唔係見到越多人排隊越熱鬧呢個先係佢哋想要拍攝到嘅畫面咩,於是我地就問個職員,但係個職員唔理會我哋,突然間我同其 他排隊等候嘅媽媽都見到好多人湧入去嗰個Thomas嘅展覽到,大人小朋友都有好熱鬧,我哋就覺得好奇怪好唔合理,明明話係記者採訪,點解有咁多小朋友一 齊嘅呢?好明顯呢個係一個來觀光嘅旅行團,我哋就向商場嘅職員去查詢,推廣部既黃小姐仲同我哋強調呢個絕對係一個記者採訪,我哋問佢點解記者採訪佢哋都冇 採訪証同埋又會有咁多小朋友嘅呢,佢哋一直都響度迴避我哋嘅問題唔答似乎係度拖延時間,隨之有一齊係度排隊既婆婆發現所謂既記者採訪在拍團體相,仲拎住一 個海報寫住(深圳跨境學童家長會慶六一國際兒童節),我哋就覺得好唔合理,點解新鴻基會俾內地旅行團「特事特辦」,可以唔使排隊優先進場參觀,而我地香港 人就要鬼鬼祟祟咁排隊,係怕內地旅行團映到我地係度排隊,定係怕「特事特辦」既處理手法被發現呢?我上前拍下海報隨即被內地團嘅一位男士惡形惡相咁問候 我,有其他在場嘅香港人睇唔過眼,就同嗰位男士講如果你打佢我一定會報警,呢個時候佢哋嘅團員拉開左個位男士,新鴻基嘅職員終於出現了,之前就話係記者採 訪,而家又解釋呢一個係一個傳媒嘅組織,跟住又話呢一個係一個內地嘅報館,幾乎咩都比佢哋講晒啦,到最後係詢眾要求底下拎岀一張卡片,卡片上個位人士只係 一個內地電視台嘅職員,呢個時候有好多旁觀嘅人士都去質問新鴻基嘅職員究竟佢哋有冇記者證,但職員全部都冇回答,最後就不了了之!
真係感慨香港究竟幾時變成咁,香港人享用香港本土的商場設施,我地唔期望亦唔要求享有特權,但偏偏新鴻基咁大既集團居然會對內地團「特事特辦」,仲要講大話話佢哋係記者採訪,睇黎今時今日新鴻基集團真係好睇唔起我哋香港人,難怪現時嘅年青人要反地產霸權!
請大家分享岀去俾香港人知呢個香港集團係點樣對香港人!」

事件星期日在社交網站瘋傳。新城市廣場服務處有鑒事態嚴重,向傳媒作出回應。

新城市廣場服務處指當日安排了約20個家庭參觀本商場舉辦的室內草坪迷宮,並同時安排了廣州電視台及兩個網站進行採訪。活動場地短暫停止開放15分鐘,以協助媒體拍攝工作。他們承認當日的內部溝通和活動安排上有改善空間,並就訪客於排隊期間遇到不便致以歉。

為了表達歉意,新城市廣場將有關活動的開放時間將稍為調整。逢周六、日及公眾假期將提前一小時開放,即早上11時至晚上10時,以回應市民對活動的支持。

就 貴網站一則報導,新城市廣場服務處有以下回應:

昨天(5月28日)下午,我們安排約20個家庭參觀本商場舉辦的室內草坪迷宮,並安排廣州電視台及兩個網站採訪。期間活動場地短暫停止開放15分鐘,以協助媒體拍攝工作。下周我們也與本地媒體舉辦類似活動,與本地小朋友及家庭分享歡樂。

我們承認在內部溝通及活動安排上有改善的空間,並就訪客於排隊期間遇到不便致以誠摯歉意。我們會汲取經驗,並進一步完善推廣活動的安排。同時,有關活動的開放時間將稍為調整,逢周六、日及公眾假期將提前一小時開放,即早上11時至晚上10時,以回應市民對活動的支持。

新城市廣場服務處

 

Leave a Reply

Your email address will not be published. Required fields are marked *

%d bloggers like this: