伯伯失禁入商場廁所被阻 熱心男怒轟途人影相唔幫手

Browse By

「香港人真係變得好冷漠!」有網民發帖慨嘆,目睹一位疑患認知障礙或自閉症的伯伯,在街上失禁後脫去一半褲子,想到商場找廁所,卻被保安阻止及恐嚇:「再行入嚟我報警」。期間有民政事務署人員上前協助,但遭保安拒絕。由於伯伯身上傳出臭味,途人都投以鄙視目光,大叫好臭,「有個男人行過仲幫佢影相打卡」!網民見狀遂報警,並用自己毛巾遮着伯伯下身,再到附近店舖買褲子。救護員到場後,將伯伯送院治理。伸出援手的網民轟:「點解見到有需要嘅人唔單只冇人幫佢,仲要阻止人幫佢等佢自生自滅?」

網民昨發帖指,途經粉嶺名都商場,見到有位伯伯脫去半條褲,「成褲都係屎」,並顯得十分徬徨,想走入商場相信是找廁所,但被保安員阻止和恐嚇「再行入嚟我報警!」樓主說,伯伯完全不會說話,又不會望人,身上掛有身份證,估計是患有嚴重認知障礙或自閉症。由於他的衣服很骯髒,「行人個個鄙視眼光大叫好臭,忌而遠之,有個男人行過仲幫佢影相打卡」!

樓主隨即聯絡當區區議員尋求協助,對方代為報警。期間有民政署人員行過,主動問保安是否需要幫忙,但「保安拒絕,話佢搞得掂,即係繼續阻止佢(伯伯)入嚟等佢自生自滅。」由於等了25分鐘仍未有警員到場,樓主再自行召救護車,並取出毛遮着伯伯下身,着保安員留意伯伯不讓他離開,自己則到附近店舖買褲子。為伯伯換上乾淨褲子後,救護車後來亦到場,「救護嚟交待伯伯生命表徵就離去,走嗰時約議員報警50分鐘後,警察終於到場」,伯伯最後被送往醫院治理。保安員讚樓主好好人,但強調「個伯伯再入嚟我要報警」,樓主回應「你一早就應該報警Call白車幫佢」。

樓主慨嘆,伯伯最徬徨之際,卻無人幫忙,更要被人影相,直斥「唔幫手不特只仲要幫手欺淩佢?!」他後來交代伯伯情況,指區議員已聯絡社會福利署,得知伯伯個案已有社工跟進,但情況近日惡化得很快。他又得知伯伯未夠65歲,正是官員形容的「仲好年青好有工作能力,唔應該接受福利嘅64歲年青人」,呼籲大家「見到人有需要幫到就幫,走頭無路完全無助好慘架!」

帖文在多個群組廣傳,網民都大讚樓主雪中送炭、好心有好報,「你好大愛,香港多啲 你呢啲你嘅人就好」、「人情冷暖,好彩您熱心同唔怕煩。影相打卡嘅花生友,真係不知所謂,學下尊重別人吧」、「將心比心,每個人都會老,亦都有時候需要別人的援手。謝謝你的付出幫助陌生人」;另有人炮轟影相男子,「人哋已經咁慘仲要影?乜心態?」

Leave a Reply

Your email address will not be published. Required fields are marked *

%d bloggers like this: