無綫享樂狂熱 True Wireless耳筒大軍壓境

Browse By

數今年最受歡迎嘅數碼Gadgets,True Wireless真無綫耳筒肯定是其一,一來價錢唔貴,二來聽歌層面真係帶嚟方便,難怪大受樂迷追棒,廠商眼見市場愈做愈大,喺聖誕節前更加係狂推相關新作應市,不管你追求大單元靚聲,又或運動時嘅舒適佩戴,甚至寧靜嘅降噪隔音,呢期上市嘅新款真無綫都可符合閣下要求,只要睇完下文介紹,一定搵到你嘅心水目標。

驅動單元愈來愈大

之前真無綫耳筒無幾款稱得上靚聲,不過今時唔同往日,由於廠商花時間同成本開發,加上技術愈來愈成熟,先係解決咗連接穩定性,繼而就喺音色方面着墨,雖然支援aptX等高音質編碼嘅機款仍然偏少,但新款真無綫耳筒所用嘅驅動單元,確實愈來愈大,好似EOZ Air就用咗8mm石墨烯動圈單元,而Master & Dynamic MW07嘅鈹金屬單元更加有成10mm,以入耳式耳筒嚟講,絕對係大尺寸,大單元好處係營造嘅音場更為廣闊,輸出力水亦更澎湃,無論聽邊一類型嘅歌曲,效果都更加震撼。

從圖可見,EOZ Air所用的8mm單元,比起主流嘅足足大上一個碼。

一眾新型號中,只有MOMENTUM True Wireless支援aptX編碼。

USB-C充電更快

新一批真無綫耳筒喺功能方面都有唔少改進,基本上機身都有IPX4或以上嘅防水防汗規格,就算唔係主打運動享樂,落雨天戴住出街都唔驚整壞。不過講到最大突破,肯定係電量,好似EOZ Air續航力就長達5.5小時,用埋個充電盒更加去到90小時,認真誇張,而且好多新作迎合咗USB-C潮流,同一條綫就可以充埋手機同充電盒,唔駛再搵返條micro USB綫出嚟,加上USB-C另一個好處係充電快,換言之,使用USB-C嘅充電盒都支援快充。

Master & Dynamic MW07改用USB-C介面,只需充電15分鐘即充滿40%電量。

發燒單元 Sennheiser MOMENTUM True Wireless

真無綫大氣已成,影音大廠點會置之不理,好似姍姍來遲嘅Sennheiser,早前喺德國《IFA 2018》發布咗MOMENTUM True Wireless,行貨日前終於抵港,外形貫徹同系風格造型,耳筒具備日常生活防水,最大賣點係採用咗發燒級嘅7mm動圈單元,且支援aptX靚聲編碼同藍牙5.0技術,加上自家出色調音,音色有保證之餘,仲有埋Transparent Hearing功能,可以收聽環境聲音,令你保持對四周嘅警覺。此外,樂迷更可透過《Sennheiser Smart Control》App,手動調校EQ等化器,以及使用Siri或Google Assistant語音功能。

售價:$2,499

查詢:Sennheiser/3412 8400

超長氣續航 EOZ Air

其實市面上好多設計出色嘅真無綫耳筒,都唔係出自大廠之手,而係初創公司藉眾籌平台集資開發,呢款來自西班牙嘅EOZ Air就係成功例子,年初喺Kickstarter進行集資,兩個月前開始出貨,早前更獲本地代理垂青,EOZ Air獨特之處唔止採用咗8mm石墨烯動圈單元,帶嚟分頻清晰嘅音色,仲有將專利嘅雙天綫整合喺耳筒嘅掛耳部分,大大提升左、右聲道之間嘅連接穩定性,加上電池續航力長達5.5小時,用埋手提充電盒更可延長到90小時,一般返工放工聽歌,差唔到兩星期先要叉一次。

售價:$798

查詢:LRT/2395 3913

10mm特大單元 Master & Dynamic MW07

如果覺得市面嘅真無綫耳筒外形過於普通,吸引唔到你,Master & Dynamic呢款MW07或者會令你回心轉意。事關廠商在外形上花咗唔少工夫,先是參考咗高級眼鏡製造,將鏡框所用嘅醋酸纖維物料,首次用喺耳筒面板,為外觀加添獨特嘅透光度同光澤,更做出猶如木紋嘅紋理,更重要係人手製作下每對耳筒嘅紋理不盡相同,唔驚撞款。除咗耳筒,MW07連手提充電盒都用咗不鏽鋼,人手打磨嘅光滑表面感覺高貴,而且改用充電速度更快嘅USB-C介面,只需15分鐘就可充滿40%電量。講到音色,MW07採用咗同級中最大嘅10mm鈹金屬單元,音質細緻,加上支援aptX、AAC編碼,音色有驚喜。

售價:$2,498

查詢:LRT/2395 3913

磁力收納 XPower INN5

新一輪真無綫大軍入面,不乏抵玩之選,當中XPower INN5更加係港產品牌嘅代表,除咗採用藍牙5.0技術,左、右耳筒可以獨立連接唔同嘅裝置,一分為二各自使用,又支援Apple Siri語音功能。至於INN5最有趣嘅地方,應該係外形十足鐵通嘅鋁合金充電盒,收納耳筒唔駛開蓋閂蓋,簡單將耳筒放入兩邊凹位,就可以靠磁力吸實,完全唔駛驚跌出嚟,而且體積小巧,重量只有51g,直接放入褲袋隨身攜帶都唔成問題,女士帶喺身一樣方便,相當於多帶一支唇膏咁上下。

售價:$699

查詢:Xpower/2708 8198

流綫低風阻 Crazybaby Air 1S

Crazybaby Air 1S屬同系首款運動成員,有別之前NANO嘅子彈造型,新作因應運動需要,將耳筒改成流綫型,機身輕巧唔在講,官方表示有效減低風阻,佩戴亦非常貼耳,加上具備IPX6防水抗汗,完全針對運動設計。Air 1S採用99.8%純度嘅碳納米管振膜同5.5mm驅動單元,前者嘅高強度帶來咗反應更佳嘅動態響應,令全頻段失真降低,而DSP則加強低音效果同3D虛擬環繞聲。值得一提,由於Air 1S嘅隨身充電膠囊體積大咗好多,足夠為耳筒完整充電三次,將續航力提升至12小時,而且支援USB-C快充。

售價:$1,399

查詢:Winner Concept/2407 1118

時尚的骰 Nakamichi My Ears II

來自日本嘅Nakamichi,之前趁住聖誕推出咗應節嘅My Ears II,紅色嘅子彈型耳筒加上充電盒,賣相搶眼,而且每邊耳筒重量只有4.7g,輕巧的骰。My Ears II採用咗6mm驅動單元同藍牙5.0技術,而為方便用家使用,表面改用咗觸控式感應控制按鍵,唔駛再大力按壓。由於左、右耳筒均設有收音咪,可以獨立使用之餘,亦無須帶晒兩邊,因應需更可以在單或雙聲道之間切換。

售價:$998

查詢:Signeo Design/3403 2813

About Jetso King

「頭條Jetso」App網羅「全宇宙」著數優惠及最新消費著數情報;激賞豐富禮品及獨家超筍優惠,易玩易中,送獎贏獎好EASY!

Leave a Reply

Your email address will not be published. Required fields are marked *

%d bloggers like this: