功能五花八門 中階手機抵玩生力軍

Browse By

中階手機抵玩生力軍

齋睇價錢,而家中階手機同啲旗艦機款差距愈嚟愈大,閒閒地都有成兩、三倍,但今時唔同往日,唔好以為價錢差幾倍,中階機嘅功能表現就差一大截,事實好多新款型號,處理器同RAM都有返咁上下,上網玩facebook打機都好流暢,唔去追求跑分分別唔會好大,影拍質素又交到功課,AI雙鏡、人像景深更加唔係旗艦專利,外形設計亦唔差,基本上全部都玩全熒幕、瀏海芒,既然中階手機都滿足到生活日常,點解要比多幾倍錢買旗艦呢?

S630/S636表現收貨

話就話將貨就價,大部分中階手機只用緊Snapdragon 630/636處理器,但性能唔失禮,《安兔兔》跑分去到80,000至120,000,雖然就咁睇同Snapdragon S845平均250,000分好似有距離,實際用落感覺唔差好遠,一般操作好似上網、玩facebook、IG都相當暢,對一般用戶嚟講表現絕對收貨,當然要玩大型遊戲好似《食雞》、《傳說對決》,畫面效果一定爭啲。此外,中階機款所用嘅S630/S636處理器仲有另一好處,就係耗電量較低,部機玩得耐都唔會咁熱,續航力亦㩒用啲。就算覺得真係非S845處理器不可都冇問題,因為S845已唔再係貴價手機專利,小米早前推出嘅新品牌POCOPHONE,頭砲F1簡直賣大包,三千蚊唔駛有S845八核心,仲配埋6GB RAM同128GB ROM儲存,根本就係旗艦規格,可以話中階價錢,旗艦嘅配置,所以話呢個年代楝手機,唔一定貴先有好嘢。

新款中階手機最常採用S630或S636八核心處理器,當然亦有例外,好似Huawei nova 3i就內置自家Kirin 710。

配備S636同4GB RAM嘅小米Max 3,《安兔兔》跑分接近120,000。

POCOPHONE F1唔止用上頂級嘅S845八核心,仲加入咗液冷系統散熱。

功能賣點花臣多

效能有返咁上下,可能你又會問有乜功能賣點?除非追求4K芒、三鏡頭、熒幕指幕呢啲新科技,否則眼下中階手機嘅功能配套應該滿足大部分人嘅要求,而且全熒幕、雙鏡頭已成標準配置,如果想要手寫筆,LG Q stylus+可讓你大筆一揮想寫就寫,仲有埋IP68防水添;想要大芒煲劇睇片,小米Max 3嘅6.9吋熒幕之大,暫時喺本地市場無出其右;影拍多玩花臣嘅話,Huawei nova 3i前後裝有四個鏡頭,帶來AI場景識別同AR手勢特效,拍攝樂趣十足。即使只想要介面簡約乾淨、軟件升級又快嘅Android One機款,預載無添加原生介面嘅Nokia 6.1 Plus大概會係你杯茶。

小米Max 3擁有6.9吋巨無霸級別大芒。

大部分中階機如nova 3i,鏡頭追加咗AI場景識別功能。

Q Stylus+除咗手寫,仲係中階機中鮮有嘅防水機款。

電子支付必備NFC

電子支付大行其道,用中階手機都可趕潮流,由於今次介紹嘅全部行Android平台,理論上用到Google Pay,但前提係要手機必須支援NFC功能,可惜大部分部國產手機都冇NFC,所以要用Google Pay,得返Sony Mobile或LG呢兩大日韓牌子,所謂魚與熊掌,有時候確難以兼得。

想趕電子支付潮流,必須揀選內置NFC功能的機款。

熒幕:6.9吋FHD+ 操作平台:Android 8.1及MIUI介面 內置記憶:4GB RAM、64GB ROM 外置記憶:micro SD NFC:不支援 電池容量:5,500mAh 體積/重量:176.15×87.4×7.99mm/221g

6.9吋巨無霸 小米Max 3

鍾意喺手機睇電子書或追漫畫,小米Max 3可謂近期難得嘅巨芒手機,6.9吋18:9畫面大到接近平板級數,用嚟睇波煲劇嗰種視覺震撼,同主流嘅5.8吋、6吋機款完全係兩個世界,加上機身做得好薄,厚度僅7.99mm,咁大芒拎上仍然好好揸手。效能方面,小米Max 3用咗S636八核心,內置4GB RAM同64GB ROM,最正喺電池亦有5,500mAh容量,續航力唔駛擔心,機價二千有找,已經有齊手機同平板享受。

售價:$1,999

查詢:小米/3001 1888

熒幕:6.2吋FHD+ 操作平台:Android 8.1 內置記憶:4GB RAM、64GB ROM 外置記憶:micro SD NFC:支援 電池容量:3,300mAh 體積/重量:160.1×77.7×8.4mm/172g

防水手寫 LG Q Stylus+

配備手寫筆嘅機款買少見少,幸好中階機中仲搵到LG Q Stylus+,而且破格加入IP68防塵防水同MIL-STD 810G軍用防撞規格,手寫繼續係重點,先喺改良咗6.2吋全熒幕寫字時,因手掌壓住而出現嘅誤按,又追加Screen off Memo功能,就算熒幕上鎖,仍然可隨時手寫記事,只是此機只用上Helio P10八核心、4GB RAM及64GB ROM,表現算係中規中矩。

售價:$3,198

查詢:LG/3543 7777

熒幕:6.18吋FHD+ 操作平台:Android 8.1及MIUI 內置記憶:6GB RAM、128GB ROM 外置記憶:micro SD NFC:不支援 電池容量:4,000mAh 體積/重量:155.5×75.2×8.8mm/182g

最平S845 POCOPHONE F1

小米新成立嘅子品牌POCOPHONE,頭炮F1繼續走高性價比,唔駛三千蚊齊S845嘅高性能、液冷散熱系統、6+128GB儲存容量同4,000mAh呢堆旗艦規格,真係平到震。而且開發團隊度身訂造咗個優化介面,加上Turbocharged引擎加速,由開Apps到打機都一樣爽快。性能爆燈,影拍一樣扎實,F1配備12MP+5MP嘅雙鏡頭,支援AI場景識別同散景,就連20MP前置鏡頭亦有AI人像同美顏模式,咁嘅價錢加有咁嘅表現,實在冇乜好挑剔。

售價:$2,799

查詢:小米/3001 1888

熒幕:5.8吋FHD+全熒幕 操作平台:Android 8.1 內置記憶:4GB RAM、64GB ROM 外置記憶:micro SD NFC:不支援 電池容量:3,060mAh 體積/重量:147.2×70.98×7.99mm/151g

Android One成員  Nokia 6.1 Plus

近期Samsung 、LG開始推Android One手機,賣點係採用原生介面同更新快,其實Nokia快人一步,早前已推出咗Nokia 6.1 Plus應市,由於只用上5.8吋瀏海芒,機身輕巧過人,而硬件則配備S636處理器同4GB RAM,一對16MP主鏡頭同5MP輔助鏡頭,唔止可以自行調校景深同玩AI拍攝,亦搵到同系大作必備嘅Bothie雙向拍攝,可以同時利用主鏡頭同16MP前置鏡同步影相拍片,將前後景物統統攝入鏡頭。

售價:$2,288

查詢:www.nokia.com

熒幕:6吋FHD+ 操作平台:Android 8.0 內置記憶:6GB RAM、64GB ROM 外置記憶:micro SD NFC:支援 電池容量:3,580mAh 體積/重量:157×75×9.6mm/204g

Hi-Res享樂 Xperia XA2 Plus

現代人都用手機聽歌,而且對音色愈嚟愈講究,開始唔再聽MP3、AAC呢啲壓縮格式,正式投身24bit/96kHz、DSD一類嘅Hi-Res音樂世界。要聽到Hi-Res歌,先要手機支援呢啲格式,Sony Xperia XA2 Plus正正兼容LPCM、FLAC、ALAC、DSF音檔,仲內置DSEE HX音效還原技術同Smart Amplifier提升音質,加上對應LDAC及aptX HD高音質編碼,無綫享樂一樣有靚聲體驗。值得一提,XA2 Plus提供三卡槽,就算開咗雙卡雙待,都可插入micro SD卡下載歌曲。

售價:$3,698

查詢:Sony Mobile/8203 8863

熒幕: 6.3吋FHD+全熒幕 操作平台:Android 8.1及EMUI 8.2 內置記憶:4GB RAM、128GB ROM 外置記憶:micro SD NFC:不支援 電池容量:3,340mAh 體積/重量:157.6×75.2×7.6/169g

前後四鏡 Huawei nova 3i

近期Huawei非常重視影拍質素,就連定位中階嘅nova 3i都唔例外,機身裝有四鏡頭,分別係16MP+2MP主鏡頭,支援場景識別同AI人像模式,而24MP+2MP前置雙鏡就加入咗3D Qmoji表情圖案,同極有電影感嘅AR手勢特效,影人同自拍都輕易拍出趣味效果。講到外形,賣相同nova 3一樣,熒幕都係6.3吋瀏海式全熒幕,但處理器換咗新一代Kirin 710,不但支援人工智能,同時整合升級版ISP同DSP,令AI表現進一步提升。

售價:$2,580

查詢:Huawei/8128 8810

About Jetso King

「頭條Jetso」App網羅「全宇宙」著數優惠及最新消費著數情報;激賞豐富禮品及獨家超筍優惠,易玩易中,送獎贏獎好EASY!

Leave a Reply

Your email address will not be published. Required fields are marked *

%d bloggers like this: