零束縛 防汗水 真無綫耳筒戴動享樂

Browse By

之前揀運動型嘅藍牙耳筒,仲會諗掛頸式設計定真係冇綫束縳嘅True Wireless好,始終後者穩定性唔太好,又唔係太多款防水防汗,不過近期新款嘅真無綫耳筒喺呢兩方面確實改善咗好多,基本上防水規格起碼有IPX4級別,左右聲道斷綫嘅情況亦大幅減少,加上電池續航力同時提升咗,所以話今個夏天要揀可以陪住你做運動嘅享音樂伴侶,真無綫嘅運動型藍牙耳筒會係首選。

連綫穩定性改善

近年發展飛快嘅True Wireless真無綫耳筒,初期確實出現過連綫問題,左、右兩邊耳筒好容易斷綫,經常聽聽下突然得番一邊有聲,要等到兩邊重新連接先變返立體聲,而且斷綫老是常出現,當你專心咁跑步或做健身時,成日咁斷都幾煩,仲邊有無Mood聽落去。不過,呢期推出嘅新款,無論大廠或二綫牌子,已經着手改良連接穩定性,包括採用新技術及重新設計天綫,務求將斷綫情況減至最低,當然要完全做到零斷綫,就點都冇可能,無綫產品始終有其侷限。

新款設計如Sony WF-SP700N,都透過改良天綫設計,減低斷綫情況。

真無綫好處係兩邊耳筒完全獨立,中間再沒有綫連住。

每款真無綫耳筒都有專用充電盒,而XPower Clear X充電盒甚至可以另外替手機充電,一盒兩用。

Bluetooth 5.0開始普及

值得一提嘅係,愈來愈多新款藍牙耳筒用上最新嘅Bluetooth 5.0技術,好似今次介紹嘅NUARL NT01同XPower Clear X都用咗新技術,雖然對提升音質冇直接幫助,但係速度方面比4.2版本快咗兩倍,連接距離遠咗四倍,而資料傳輸量更有8倍升幅,簡單嚟講,如果耳筒要進行軟件更新,時間會快咗好多。另外,新技術仲會自動檢查所用嘅2.4GHz頻道有冇受鄰近嘅LTE干擾,並會自動加以阻止,咁樣就可以令連接更加穩定。

Bluetooth 5.0無論速度、覆蓋及傳輸量都比上代提升,仲可自動避開LTE嘅干擾。

IPX4防水起跳

全民運動及健身熱潮帶動下,愈來嚟愈多人跑步同做Gym,呢啲天氣莫話講喺室內都滿頭大汗,跑街跑幾公里肯定大汗淋漓,所以如果要戴住藍牙耳筒聽歌,一定要有防水保護,而以下5款新型號,最起碼達都具備IPX4規格,最高更加達IP67。要記住防水未必等於防汗,尤其運動時郁啲滿頭大汗嘅用家,耳筒長時間被微酸性嘅汗水整到濕晒,好易入到裡面侵蝕底板,就算防水幾勁都冇用,所以自問大汗的話,最好揀有埋防汗保護嘅款式,同埋每次用完最好用清水清洗耳筒。

XPower Clear X防水規格達IP67,可以浸入1米水深30分鐘。

※※※※※※※※※※

Tips : 環境聲自選開關

雖然運動型耳筒好少加入aptX或LDAC呢類靚聲編碼,但部分就內置咗隔音降噪同收聽環境聲(Audio Transparency)功能,當中Sony SP700N就有齊兩個功能,係室內想完全忘我做瑜伽,可以開着隔音,而喺街跑步想留意四周環境,咁當然可以利用App打開Audio Transparency設定,就算聽住歌都可以隨時聽到有乜突發事情嘢發生,安全好多。

※※※※※※※※※※

佩戴舒適 Bose SoundSport Free

True Wireless選擇眾多,不過唔係隻隻戴得舒服,不過當你戴咗Bose SoundSport Free,可能會對真無綫耳筒改觀都唔定,事關用咗備受好評嘅StayHear+耳塞,佩戴舒適又穩定,而且10g重量唔覺累贅,為咗解決同類耳筒易斷綫嘅毛病,廠商特登改良咗藍牙天綫同接收。至於音色由Bose調音後,音場廣闊唔在講,低音亦好夠力,唯一要挑剔可能係手提充電盒大咗啲,但就可以連續為耳筒充電兩次,額外再聽多10個鐘。

售價:$2,098

查詢:Bose/2123 9000

平價之選 XPower Clear X

真無綫耳筒愈賣愈平,X Power Clear X更加係五百蚊有找,但功能規格一啲都唔差,淨係防水已經去到IP67級別,唔好話滂沱大雨,就算唔少心跌咗落水,攞番上嚟繼續戴都冇問題。此外,Clear X用咗最新嘅Bluetooth 5.0技術,無綫覆蓋更擴,連綫亦更加穩定,唔聽歌嗰陣,左、右聲道仲可以分開配對兩部手機,當成兩隻藍牙耳機獨立使用。

售價:$498

查詢:XPower/2708 8198

降噪隔音 Sony WF-SP700N

外形略帶WF-1000X影子,但Sony WF-SP700N內部天綫經過重新設計,左右聲道連接更加穩定之餘,耳筒頂部又加咗弧形耳翼,令運動時依然可以穩固佩戴,唔會咁易掉落。WF-SP700N最正嘅地方係內置降噪隔音功能,想投入寧靜世界做瑜珈得,想聽到周圍環境聲音,喺Apps開啟相關功能就得。除咗有唔同EQ音音可以揀,由於耳筒內置Extra Bass重低音,必要時大可用強勁嘅節拍,幫你沿途打氣。

售價:$1,690

查詢:Sony 2833 5129

HDSS高音質 NUARL NT01

為解決真無綫耳筒斷綫及音質嘅問題,日本NUARL NT01率先採用咗HDSS技術、薄型ELT及藍牙5.0,實行三管齊下,確保無綫連接穩定清晰,而且擁有高質音色表現。以人體工學設計嘅NT01,佩戴相當舒服,而內部由於加入咗納米塗層耐水處理,防水防汗效果相當於IPX4。此外,重量只有5g嘅NT01,續航力可達5小時、而電池盒就可以額外為耳筒充電1.5次,換言之,最長可以聽足12個半鐘。

售價:$1,099

查詢:大昌影音/2262 1173

四色搶眼機身 JVC HA-ET900BT

紫、紅、黃、黑四色機身都鮮艷搶眼嘅HA-ET900BT,係JVC第一款True Wireless之作,除咗IPX5防水規格,另針對跑步時身體大幅擺動,耳筒特別採用咗三點支撐構造,就算點郁嚟郁去,都可以保持耳筒穩固貼緊雙耳。雖然呢對日系新作冇收聽環境聲功能,但係廠方好貼心咁整咗個便攜袋,等你做運動時可以將充電盒放入去,然後夾係腰間,咁就唔駛下下放入褲袋阻住晒。

售價:$1,080

查詢:信興/2733 3888

Leave a Reply

Your email address will not be published. Required fields are marked *

%d bloggers like this: