擬帶未打疫苗幼女到沖繩 護士提醒風險高 港媽:唔係咁玩法呀

Browse By

日本沖繩縣自上月底持續出現麻疹感染個案,衞生防護中心呼籲旅客提高警惕,未滿一歲的兒童由於仍未適齡接種麻疹疫苗,則不應前往當地。有診所護士亦接獲家長詢問,能否帶其未滿一歲女兒到沖繩旅行,護士回覆指應自行決定,但強調「未打疫苗嘅,風險就會比較高」,詎料家長稱「唔係咁玩法呀,難得一家人去旅行搞啲咁嘅嘢!」

該護士在其facebook專頁「診所低能奇觀」分享帖文,指有媽媽致電診所查詢,沖繩爆發麻疹個案,能否如常到當地旅行。護士聽罷便問對方曾否接種麻疹疫苗,媽媽表示不肯定自己有沒有,但其未滿一歲女兒曾打過針。護士隨即解釋,兒童一歲才會接種麻疹疫苗,「之前打嗰啲係冇㗎」,媽媽大感詫異:「咁白痴㗎咩?有分㗎咩?」並說「但係我機票酒店咩都畀晒錢啦喎?佢而家嗰度幾十人有,我個女嚟㗎喎?」

護士最後着媽媽自行決定,強調「始終未打疫苗嘅,風險就會比較高」,但媽媽仍不服氣:「喂,唔係咁玩法呀,難得一家人去旅行搞啲咁嘅嘢」,並繼續追問:「我個女嚟㗎喎?」護士耐心地解釋:「麻疹唔會鎖定目標咁揀男性定女性㗎!」結果家長說「我係問會唔會死人呀?」護士無奈回答,其實任何疾病都有機會引發其他問題,但惹來媽媽不滿,「我叫你是但搵個人答都唔係咁答法呀?即係點算呀?」隨即收線。

帖文引起網民留言熱議,有網民認為「去玩啫!駛唔駛搵命博先」、「驚就唔好去,去就唔好驚」、「如果個女無機票咁值錢,咪飛囉」。

衛生防護中心昨表示,計劃前往沖繩的市民出發前應先檢視其疫苗接種紀錄,未有免疫力的人士應就接種麻疹疫苗事宜諮詢醫生意見,而醫生通常會為他們一併注射流行性腮腺炎和德國麻疹疫苗,即麻疹、流行性腮腺炎及德國麻疹混合疫苗。至於未滿一歲的兒童,由於仍未適齡在「香港兒童免疫接種計劃」下接種麻疹、流行性腮腺炎及德國麻疹混合疫苗,故此對麻疹沒有免疫力。他們在沖繩麻疹爆發期間,不應前往當地。市民如須在沖繩爆發麻疹期間攜同未滿一歲的兒童前往當地,應先諮詢醫生意見。

Leave a Reply

Your email address will not be published. Required fields are marked *

%d bloggers like this: