手機拍片無頭暈 三軸穩定器防震補品

Browse By

雖然話而家大部分旗艦手機都有光學或電子防震功能,但如果咁就以為可以拎起部手機Pan左Pan右,甚至邊行邊走邊拍,頭幾十秒可能仲頂得住,時間一長好難維持到雙手穩定,加上好多人揸機手勢本身唔正確,唔覺意郁一郁就已經搞到個畫面浮浮下,更加唔好講話一路行住影,嗰啲又搖又失經無神轉嚟轉去嘅王家衞式拍法,真係唔睇到暈已經偷笑,莫過話要人好好欣賞落去。

三軸穩定器(Stabilizer)嘅其實好早已喺市場出現,不過當時主要用喺電影拍攝或專業攝影,價錢絕對唔平,隨住科技進步,加上手機、Action Cam拍片大行其道,專為後兩者而設嘅三軸穩定器開始普及。目前,市場上嘅三軸穩定器主要係採用電子方式穩定為主,而所謂嘅三軸分別係X軸(水平)、Y軸(垂直)及Z軸(旋轉),藉住穩定器內置嘅陀螺儀,產生出反方向嘅移動嚟抵銷手機本身嘅晃動,從而帶來顯著嘅穩定效果。

市場上嘅三軸穩定器款式眾多,不過無論系出名門嘅DJI,又或本土炮製嘅XPower,外形設計同用法查實大同小異,價錢亦唔差幾遠,至於挑選時主要考慮佢地有幾多種拍攝模式、支唔支援USB充電、對唔對應藍牙連綫,同埋可以裝到最大幾多吋嘅手機,即係最大負重。

三軸即係左右移動(Pan)、上下傾斜(Tilt)、橫直旋轉(Roll)。

跟隨模式有乜用

因應唔同嘅拍攝環境,三軸穩定器需要切換至唔同嘅拍攝模式,一般嚟講可以分為三大類──跟隨、半跟隨及鎖定模式。當中最常出動嘅係跟隨,即利用體感嚟操作,手點郁手機就會作出相應移動,效果最隨意同靈活,適合拍攝風景或影全景相。鎖定模式顧名思義就係Lock實咗嗰拍攝方向,只可以透過Joystick作上下移動,隻手點轉嚟轉去都唔會影響取景方向,畫面夠晒定,好啱用嚟拍大型建築物或近期流行嘅Hyperlapse。至於半跟隨就係鎖定上下方向,手機反而係跟住隻手轉左轉右,呢個Mode主要用嚟影人或一啲適合Pan住咁影嘅靜態主體。

常用嘅跟隨模式係你隻手點郁,手機就會作出相應轉動。

新款穩定器追加了方便做社交直播嘅垂直模式。

SwiftCam M4可另購IR追蹤器,玩fb live都可用到人臉追蹤。

Tips: 砝碼平衡重量

每一支三軸穩定器都有一定嘅承重量,但當你裝部手機上去,發現穩定器Balance唔到,手機出現側埋一邊嘅情況,咁即係手機太輕或太重,如果手機係iPhone 8 Plus一類大芒機,可能需要喺摩打後面加返個砝碼入去,相反iPhone SE呢啲細欄,就係要砝碼拎返出嚟,咁先可以調校到穩定器變得平衡。

大芒手機可能需要加入一定重量嘅砝碼嚟平衡。

USB隨時叉電

而家連Notebook都可以用USB尿袋,冇理由三軸穩定器仲要拆粒電池出嚟叉電咁遴迍,所以揀時最好搵啲可以直接插USB叉電嘅款式,去旅行拎出街用時就唔駛擔心幾時無電。

部分穩定器設有micro USB,可以外接尿袋隨時充電。

DJI Osmo Mobile 2好賣到斷市

除咗航拍機,DJI出品嘅穩定器一樣好評如潮,好似上月先推出嘅Osmo Mobile 2,485g重量比第一代輕咗之餘,又加入咗直度模式,方便喺facebook開Live直播,電池續航力仲提升去到15個鐘,甚至可以充當後備電源為手機充電,不過最吸引係價錢一千蚊有找,平過唔少大廠,難怪一開賣就人人爭住要,搞到Apple Store一度無晒貨。

支援手機尺寸:6.2吋或以下

手機App:《DJI GO》

售價:$998

查詢:Apple/800 908 988

Xpower MS1 自動追蹤

本地品牌Xpower唔止做手提充電器同傳輸綫有一手,估唔到出三軸穩定器亦有板有眼,呢支MS1造型同設計跟其他大廠差唔得幾多,可以裝到6吋以下嘅手機,大芒如iPhone 8 Plus都冇問題,且備有四種拍攝模式,分別係跟隨、半跟隨、鎖定同開Live用嘅垂直模式。值得一提嘅係配合《Gimbal Studio》App,仲可以玩埋人臉追蹤,自動鎖定目標追住拍真係幾方便。

支援手機尺寸:6吋或以下

手機App:《Gimbal Studio》

售價:$998

查詢:Xpower/2708 8198

SwiftCam M4兼容Action Cam

專攻手機穩定器嘅SwiftCam,新一代M4預設多達7種拍攝模式,傳統以外,仲多咗垂直、TimeLapse、GoPro、Sony運動相機及360相機模式,換言之,可以玩埋主流Action Cam同360/VR相機,而後者只需利用一粒1/4吋標準腳架螺絲,就可以固定喺定盤上。M4另一好玩地方係可以再加裝IR tracing模組,有別一般App嘅追蹤,裝咗呢個模組後,就算喺facebook或Instagram做直播,都可以開啟人臉追蹤,令直播效播更專業。

支援手機尺寸:7吋或以下

手機App:《SwiftCam Live》

售價:$2,099(M4)、$899(IR人面追蹤模組)

查詢:Winner Concept/2407 1118

智雲Smooth Q邊拍邊充

除咗操作應比上代Smooth II更快,智雲Smooth Q另一優點係唔駛加裝砝碼,就可以直接裝上大尺寸手機,唔駛下下又拆又裝嗰砝碼咁麻煩。如果細心留意,會發現手柄底部多咗個標準USB頭,原來用嚟替手機充電,方便一邊拍一邊充。講到佢個App,功能都幾豐富,包括可以喺App入面設置鎖定角度、跟隨速度同控制快慢。

支援手機尺寸:6.5吋或以下

手機App:《智雲掌上助手》

售價:$650

查詢:Ying Kee/5409 0937

FeiyuTech G360全景專用

除咗用手機拍片同直播,近年亦興起咗玩360全景相機,如果唔想拍嘅360度影片成日有隻手出現或畀隻手遮咗啲,可以添置FeiyuTech G360呢種專為360 Cam而設嘅穩定器,獨特嘅雙塔式設計,可以避免手柄遮擋鏡頭嘅情況出現。唔止360 Cam,呢支穩定器亦啱手機用,只要利用適當轉換附送嘅4個砝碼,可以平衡到100至300g重量嘅相機或手機。

相機/手機重量:100g-300g

手機App:《Feiyu On》

售價:$2,680

查詢:OTG/3700 5700

Leave a Reply

Your email address will not be published. Required fields are marked *

%d bloggers like this: