Selfie玩盡景深 前置雙鏡新Phone氣

Browse By

過去啲旗艦機玩雙鏡頭,清一色放喺機背,通常係主鏡頭加個長焦距嘅副鏡頭,用途多數係影相有2X變焦,又或都彩色、黑白各一,扮下文青影啲對比感強烈嘅藝術照。不過,時下人真係好愛Selfie自拍,所以廠商搞下搞下,都係決定將雙鏡頭設計改番去前置,始終愛美女士為咗自拍呃Like,真係乜都肯試,換機當作閒事。為咗搶飲頭啖湯,短短兩、三個月,市場上出現多部以前置雙鏡頭為噱頭嘅手機,當中不乏來自Samsung、HTC、Sony Mobile等大廠,亦見Alcatel、Sugar等二綫品牌欲來分一杯羮。

中階以至入門機款,近期紛紛以前置雙鏡頭作招徠。

手動即時調校

目前所見,前置雙鏡手機定位以中階及入門為主,大概看準愛玩自拍嘅女士們,多唔係以追求效能為大前提,反而着重美顏效果、有冇得玩卡通貼圖,所以廠商整多個前置鏡頭之餘,同時加入咗好多影拍玩意,當中景深效果更加係指定項目,可以畀女士自行調校景深淺,想要背景朦啲或清啲,拉一拉條Bar就搞掂,可以拍一幅清、一幅朦,加上大部機款都設有先拍攝後對焦嘅功能,基本上影相返去慢慢再整都冇問題。

自拍時手動調校景深淺話咁易。

影完事後再加減景深效果都冇問題。

花臣多多

影完人像沙龍,又可利用兩個鏡頭嘅焦距特性,玩下個人特寫或大班人Selfie嘅分別,唔駛下下影自己咁鬼悶,當中有啲新作就連前置都加入埋OIS光學防震,遇上唔夠光嘅情況,都可以減低手震嘅影響,輕輕鬆鬆同鬆郁朦講Bye Bye。前置自拍又怎少得美顏美肌呢啲PS功能,大部分新作都內置自家人臉美化技術,始終發展了好幾年,美白、瘦臉等效果都相當成熟,呢方面唔需要擔心。講到近年女士興起玩AR貼圖,扮下哨牙兔仔、小貓小狗,確係好可愛,而今日介紹嘅新機,大部分都有埋呢啲卡通貼圖功能。

時下最興係玩卡通Sticker,自拍扮可愛動物。

大部分前置雙鏡提供廣角選擇,一班人自拍唔駛用棍嘅。

全熒幕勢成主流

今時今日,全熒幕已經唔係旗艦手機專利,今次Jetso King介紹嘅五款前置雙鏡頭機款,雖然定位中階至入門,但除咗Xperia XA2 Ultra,其餘四款全部配上咗18:9或18.5:9嘅全熒幕,上下兩邊大幅收窄,而機身則變得好修長,就算畫面尺寸由5.7吋起跳,手感都唔會話好大部,跟傳統16:9畫面比例嘅巨芒手機好唔同。

除咗全熒幕,部分型號更用咗三卡槽設計。

Samsung Galaxy A8+穩陣拍片

啱啱開賣嘅Galaxy A8+(2018),唔止係Samsung今年嘅頭炮,亦係同廠首款裝咗前置雙鏡頭嘅機款,話就話A系,但外形同功能集合咗S8+同Note8之長,用咗6吋18.5:9嘅Infinity Display,對稱邊框設計頗有S8+影子,機身亦支援IP68防水,仲首次將機背指紋Sensor搬到中央。而一對前置鏡頭分別為16MP及8MP,透過Live Focus功能即可預覽調校景深。至於機背F1.7大光圈16MP鏡頭更支援數碼影像穩定(vDis)技術,手持拍片都唔出現畫面晃嚟晃去嘅情況。效能方面,A8+(2018)採用自家Exynos 7885八核心,內置6GB RAM及64GB儲存容量。值得一提嘅,呢部機都有三插卡槽,可以同時插入兩張SIM卡及micro SD卡擴充。

 

Info

熒幕尺寸:6吋FHD+(2,220×1,080)

操作平台:Android 7.1

內置記憶:6GB RAM、64GB ROM

外置記憶:micro SD

電池容量:3,500mAh

體積/重量:159.9×75.7×8.3mm/191g

售價:$4,398

查詢:Samsung/3698 4698

HTC U11 EYEs手握開Apps

U11系列可謂近年HTC省招牌之作,繼U11及U11+兩款旗艦後,日前再帶來中階型號U11 EYEs,6吋18:9全熒幕上方找到一對5MP前置雙鏡頭,有齊HDR Boost、實時景深同美顏等功能,加上全新嘅卡通Sticker,玩法多多之餘,機背更沿用U11/U11+備受好評嘅12MP主鏡頭,影拍質素毋庸置疑。雖然新作只係行緊Android 7.1平台,但Edge Sense介面都搵到Edge Launcher,握一握邊框就會彈出圓形選單,快速開Apps,仲有最新嘅臉部辨識解鎖。效能唔駛擔心,事關U11 EYEs用咗S652八核心同4GB RAM,內置64GB容量,而優惠期內入手,更加可免費獲得價值$882嘅專用配件組合。

 

Info

熒幕尺寸:6吋全高清(2,160×1,080)

操作平台:Android 7.1

內置記憶:4GB RAM、64GB ROM

外置記憶:micro SD

電池容量:3,930mAh

體積/重量:157.9×74.99×8.5mm/185g

售價:$3,898

查詢:HTC/3077 5588‎

Sony Xperia XA2 Ultra預載Android 8.0

作為品牌今年亮相美國《CES電子展》嘅新作,Xperia XA2 Ultra貫徹Sony個性,堅持唔追逐全熒幕潮流,6吋全高清芒依然以16:9比例示人,不過就改用背置式指紋設計,唔同上一代嘅機側解鎖。有別其他同級嘅前置雙鏡頭,呢部嘅16MP鏡頭同8MP廣角鏡頭支援OIS光學防震,自拍成像更佳,玩法亦多咗變化。至於23MP主鏡頭拍到4K片之餘,仲可以影埋120fps慢動作效果。核心用咗備受好評嘅S630處理器,且預載咗最新Android 8.0平台,唔似得對手仲停留喺Android 7.0,即時玩到畫中畫、自動填表呢啲新功能。

Info

熒幕尺寸:6吋全高清(1,920×1,080)

操作平台:Android 8.0

內置記憶:4GB RAM、64GB ROM

外置記憶:micro SD

電池容量:3,580mAh

體積/重量:163×80×9.5mm/221g

售價:$3,498(2月推出)

查詢:Sony Mobile/8203 8863

Huawei Nova 2i前後4鏡頭

Huawei近年確實進取,唔止旗艦Mate 10有突破,就連中階嘅nova 2i一樣可以喺同級鶴立雞群,呢部機身前後都有雙鏡頭,換言之,一部機有成4個鏡頭,分別係機背嘅1600萬像素主鏡頭同200萬像素副鏡頭,一對前置鏡頭就係1,300萬像素加200萬像素,影景又好,自拍又好,全部都玩到淺景深,將背景虛擬化,都咪話唔盞。講到規格,nova 2i就用裝有5.9吋18:9嘅全熒幕,內置自家Kirin 659八核心、4GB RAM同64GB ROM,表現中規中矩。

 

Info

熒幕尺寸:5.9吋全高清(2,160×1,080)

操作平台:Android 7.0

內置記憶:4GB RAM、64GB ROM

外置記憶:micro SD

電池容量:3,340mAh

體積/重量:156.2×75.2×7.5mm/164g

售價:$2,880

查詢:Huawei/8128 8810

Sugar C11最划算入門

近年唔玩Bling Bling閃爍造型,改行性價比路線嘅Sugar,早前推出呢部C11,確實令人幾驚訝,事關機價千九蚊有找,已經有齊5.7吋18:9全熒幕同前置雙鏡頭兩大元素,真係好有市場觸覺。講返嗰雙鏡頭,分別用咗20MP高感光主鏡頭同800萬像素120度超廣角鏡鏡,配合雙鏡自拍功能,一大班人玩自拍都唔駛出動自拍棍。始終一分錢一分貨,雖然影拍交到功課,其他硬件規格真係好入門,處理器只用上S430八核心,好在仍有4GB RAM同64GB ROM,整體操作都叫正常。

 

Info

熒幕尺寸:5.7吋高清(1,440×720)

操作平台:Android 7.1

內置記憶:4GB RAM、64GB ROM

外置記憶:micro SD

電池容量:3,000mAh

體積/重量:152.3×72.8×8.3mm/166g

售價:$1,898

查詢:Sugar/2811 1333

 

About Jetso King

「頭條Jetso」App網羅「全宇宙」著數優惠及最新消費著數情報;激賞豐富禮品及獨家超筍優惠,易玩易中,送獎贏獎好EASY!

Leave a Reply

Your email address will not be published. Required fields are marked *

%d bloggers like this: