相機手機任選 360全景隨身開拍

Browse By

自從兩年前facebook開始支援360全景相同埋片,拍咗嘅作品唔駛再搞一輪上傳去指定網站,而家直接上傳去社交平台就可以分享畀各方好友,加上VR裝置興起,確實令360相機向前邁進咗一大步,同時吸引咗好多大牌子加入市場,當中唔少係手機大廠,好似Samsung、LG、Huawei、小米同ASUS等等,全部爭住出360相機,講用料講拍攝質素,拍得住相機品牌嘅出品,去到近期仲出現一堆專為手機度身訂造嘅360鏡頭,直接插入手機就影到全景相,部分配合專用Apps,玩埋Live做直播都得。

串流facebook開Live

或者好多人冇玩過全景拍攝,對所謂嘅360影像冇乜印象,其實只要你用過Google嘅街景模式搵路,又或者戴過HTC Vive、PSVR一類頭盔玩虛擬遊戲,嗰種轉嚟轉去嘅視覺效果就係360全景,相信大部分人都曾經接觸過。要玩360全景拍攝,早幾年啲器材好大陣仗,而家真係輕便太多,攞住部相機,利用前後兩個魚眼鏡頭,就可以輕鬆開拍360全景相、影片或VR,部分新型號拍片解像度仲去到4K級數。

360全景相機係方便,基本上拎喺手㩒個掣就拍,但由於冇芒,要即時預覽取景,又或拍完想即睇返啲畫面,一定要經App連住手機,經過幾代改良,而家相機同App連接穩定咗好多,好似Ricoh THETA V嘅App《THETA+》,同步取景流暢,仲可以直接執相,提高對比度、光度等,甚至加入唔同嘅濾鏡,以及玩埋Sticker貼紙。講到分享功能,新機愈嚟愈多元化,除咗直接上載社交平台,有啲有埋Remote Playback功能,可以將畫面經WiFi傳送到電視播放,相機即時變成遙控器。所以話比起之前連Preview都睇唔到,今時今日玩360全景真係方便好幾倍。

THETA V可以即時將360影像無綫傳去電視播放。

唔少專用App加入咗社交平台直播功能。

USB直插手機用

如果想睇住熒幕取景,一手揸相機,一手揸手機,真係唔太方便,為提高拍攝機動性,今年有廠商開發出手機專用嘅鏡頭,直接插入手機,再開App就可以玩360拍攝,易用唔在講,啲鏡頭仲好鬼的骰,好似ASUS同Huawei出嗰兩款新作,大小都係鎖匙扣咁上下,重量唔過30g,成日帶住喺身都冇問題,美景當前瘋狂自拍後,又想玩下360全景,將個鏡頭插入手機,又可以拍個夠,輕便易攜之餘,更重要係價錢唔貴,大部分千元有交易,相比全景相機,便宜一半有多。

手機廠近期爭相開發USB介面嘅360鏡頭配件。

BOX 三種常見模式

唔理你用相機或鏡頭配件玩360全景,一般嚟講都有幾種常見模式畀你揀,分別係將周圍拉到變成直綫嘅全景(Panoramic),將地面景物壓縮成星球模樣嘅小行星(Asteroid),同埋四圍黑晒、淨係睇到一個圓形畫面嘅水晶球(Spherical),有啲可能多咗嚴重變形嘅魚眼(Fisheye),又或畫面一分為二嘅VR模式,想要邊種效果純粹個人選擇,不過網上所見,最多人玩係小行星,事關可以影到自己喺正中央,四周又被蔚藍天空包住,最容易拍到得意嘅360效果。

全景模式

小行星模式

水晶球模式

注意企位避免怪手

由於所用嘅鏡頭都係廣角焦距,影像容易變形,自己入鏡時要注意企位,盡量正向鏡頭,另如果唔想畫面入面出現拉長咗嘅怪手,最好係出動自拍棍三腳架嚟放置,唔好直接用手舉高,就可以避免呢隻怪手破壞晒成個構圖。

建議使用自拍棍或三腳架。

直接揸機好容易出現怪手。

街景認證 THETA V

講得上係全景相機始祖嘅Ricoh THETA,唔經唔覺推出到第五代,雖然THETA V外形改變唔大,但拍出嚟嘅質素更靚更Sharp,暗位處理亦比之前好,加上操作爽快,拍片又升級至4K,難怪成為同級中首部獲得Google認證的「Street View mobile Ready」相機。五代仲有唔少新配件,好似可潛入水深30米拍攝嘅TW-1防水殼,以及聯同Audio-Technica開發嘅3D收音器TA-1,擴充性十足,加上新增嘅Remote Playback功能,可以將畫面經WiFi轉換器無綫傳送到電視或投影機,喺大熒幕開心Share全景影像。

售價:$3,890

查詢:捷成/2926 2300

6軸防震  米家全景相機

自小米之手嘅米家全景相機,價錢一貫大眾化,啱啱聖誕仲減咗價,而家千七蚊都唔駛,就可以買到呢部纖薄之作,放喺衫袋褲袋隨身,除咗拍到7K相同3.5K全景片,多得內置EIS六軸電子防手震,就滑住雪咁拍,畫面都幾定下。米家全景相機另一賣點係內置1,600mAh大容量電池,足夠拍攝200張全景相,又或喺WiFi開啟下錄影75分鐘HD全景片,仲可以用QC 2.0快充,甚至直插尿袋充電。

售價:$1,699

查詢:小米/3001 1888

環繞聲收音 VIRB 360

專業運動品牌Garmin早前踩過界,推出咗部專業級嘅VIRB 360,除咗拍攝自動拼接嘅4K/30p全景片,如果揀手動後期製作,可以直接錄影最高5.7K/30p嘅影片,同時利用機身四個收音咪360度收音,重播時營造包圍感十足嘅環繞聲音效。講得上專業,因為呢部新作支援聲控,運動時可以口代手,隨心所欲咁開動或暫停拍攝,加上內置多個感應器,同步記錄GPS、GLONASS等G-Metrix數據,並將數據資料Save入條片。

售價:$6,499

查詢:Garmin/3568 3786

28g超輕量 ASUS 360°

啱啱加入360鏡頭行列嘅ASUS,頭炮ASUS 360°賣點係體積小巧,重量只有28g,隨身攜帶不成問題,如果你部Android手機已經係USB-C介面,直接將鏡頭插上就用得,如果係Micro USB則須加多個轉接器,之後打開App《ASUS 360° Camera》,就可開拍4K全景相或2K嘅360影片。唔好以為鏡頭細細,原來廠商加入咗獨立晶片修正失真問題,同時喺軟件層面進行影像優化及自動白平衡處理。

售價:$998

查詢:ASUS/3582 4770

 

四種模式 EnVizion 360

藉住Mate 10系列手機熱賣,Huawei趁機推出自家首款全景鏡頭EnVizion 360,前後210度廣角鏡頭都用咗13MP CMOS,可以拍攝5K相片、2K 360全景相同片。除咗同廠Mate及P系列新作,亦對應Android 6.0或以上、配備USB-C介面嘅機款。相比其他對手,佢嘅專用App《Huawei 360 Camera》,唔止支援360全景及VR拍攝,仲提供四種觀看模式,包括透視、魚眼、小行星及水晶球。

售價:$1,228

查詢:Huawei/8128 8810

社交直播 ION360 U

iPhone用家都玩得到全景拍攝,好似ION360 U呢套兩用嘅鏡頭機殼,直接套上手機,閒時就當保護殼用,仲可以幫手機充埋電,唔駛擔心拍拍下冇電。想拍360時只要將個鏡頭模組套入手機,再開App就影到360相同4K片,最特別嘅地方係可以即時串流去facebook或YouTube平台,隨時開Live,簡直係直播利器,除咗支援iPhone 7/8系列,Galaxy S8系列都可以玩埋一份。

售價:299美元(約2,320港元)

查詢:ion360.com

About Jetso King

「頭條Jetso」App網羅「全宇宙」著數優惠及最新消費著數情報;激賞豐富禮品及獨家超筍優惠,易玩易中,送獎贏獎好EASY!

Leave a Reply

Your email address will not be published. Required fields are marked *

%d bloggers like this: