藍牙耳筒進化 True Wireless冇綫纏繞

Browse By

用嚟聽歌嘅藍牙耳筒大大話話有成十年歷史,由最初頭戴Headphone到前衞嘅後兜設計,以致近年掛頸、衫夾款式空群而出,體積無疑細咗好多,但由於左、右耳筒始終有條綫或者有個箍喺度,唔好話做運動,有時行得快啲都整到條綫或個箍揈嚟揈去,既唔方便,亦唔舒服。去到上年,藍牙耳筒終於進化至True Wireless大時代,左、右聲道獨立分開,之間再無任何纏繞或牽掛,每隻耳筒體積好似耳塞咁細,重量唔到10g,造型夠晒輕便,用嗰時就咁塞入耳仔就得。

當然,True Wireless耳筒的骰成咁,唔多唔少都有啲限制,最明顯係電池容量少得多,續航力頂盡只得四個鐘左右,比起傳統無綫款式少一大截,所以差不多全部都附送一個設計成收藏盒咁嘅流動充電器,放入去就可以隨身充電,通常可以為耳筒額外完整充電兩次,換言之,帶埋充電盒出街,聽足成日基本上冇乜問題。

偶爾斷綫 在所難免

始終開發時間尚短,True Wireless耳筒難免有點缺點,用家最常投訴嘅係斷綫,有時係耳筒同手機之間訊號斷咗,有時係左、右兩邊之間連接甩咗,聽聽下歌突然無咗聲,確實幾沒癮,但今年啲新款式出現呢個情況已經大為減少,偶爾斷一兩次就好難避免,尤其去到一啲多干擾嘅地方,如果斷綫斷得密,咁就要或試下將部手機擺喺唔同嘅位置,情況應該有改善。

唔好以為True Wireless耳筒入面粒驅動單元細,又唔對應apt-X或LDAC呢類高音質藍牙編碼,音色就麻麻地,實在有啲型號試用後,效果真係唔差,好似Jaybird Run、Sony WF-1000X肯定喺水準以上,後者更加可以用App玩埋降噪隔音。講到手機Apps,好多用家買咗對真無綫耳筒,就咁Pair咗部手機聽到歌就算,實情喺想對耳筒嘅音色或功能發揮得好啲,最好下載埋專用嘅手機Apps,打開咗應用程式,你會發現好多設定畀你調校,如EQ、低音加強,試下多啲用下呢堆功能,話唔定可以校到合你心水嘅音色。此外,部分Apps仲可以替耳筒進行軟件更新,真係好有用㗎。當然,有啲主攻運動款式會內置心跳Sensor,跑步時一邊聽歌一邊幫你偵測埋心跳率,繼而透過專用App記錄相關數據,甚至提供私人教練咁嘅語音提示,所以唔好睇小機身細細嘅True Wireless耳筒,功能同用途已經同傳統無綫耳筒相差無幾。

部分充電盒好似Jaybird Run,仲支援埋快充,叉五分鐘就夠用一粒鐘。

除咗耳棉同耳膠,為咗做運動時都戴得穩穩陣陣,通常隨盒都跟埋多對耳翼。

Gear IconX(圖)同Elite Sport內置咗Sensor,可以實時偵測心跳。

部分Apps同步記錄運動數據,即時統計分析,猶如個人教練。

利用Apps嘅聲音設定,可以調校最啱自己口味嘅音效。

WF-1000X嘅專用App畀你設定唔同隔音效果,甚至收音位置,花臣多多。

Jaybird RUN 入盒快充

備受跑友愛戴嘅Jaybird,去年被Logitech收購後,開發步伐慢咗落嚟,等咗成年終於有新作Run,除咗耳筒比同級對手輕之餘,最重要係保持一貫靚聲水準,同級對手入面音色難得有驚喜,仲可以喺App調校高、中、低頻同EQ。由於針對運動享樂,耳筒附有耳翼加強穩定性,同時有齊防水防汗保護。講到續航力,都有成四個鐘,連埋外置充電盒可額外提供八小時,而且充電時係用咗快充,放入盒度叉電5分鐘,就可以再聽一粒鐘。

專用App:《Jaybird MySound》

售價:$1,699

查詢:jaybirdsport.com/en-hk

Sony WF-1000X 智能降噪

姍姍來遲嘅Sony,終於係上個月推出咗首款True Wireless之作WF-1000X,外形的骰,佩戴又夠穩陣,除咗6mm單元音色扎實,賣點係內置最新嘅Sense Engine同感應環境音效功能,配合專用App《Sony Headphone Connect》,可以自動偵測用家喺坐定定、行緊又或搭緊車,從而按實際環境開啟降噪或收聽環境聲音,想靜嗰時就靜,要聽街聲就聽街聲,幾鬼智能,仲要定價唔貴,甚至平過好多細廠,真係可以考慮。

專用App:《Sony Headphone Connect》

售價:$1,790

查詢:Sony/2833 5129

Samsung Gear IconX 聲級教練

新一代Gear IconX(2018)支援自家力推嘅Bixby智能語音助理,可以用語音控制播放、聲量或接聽來電。耳筒依然內置咗4GB容量,可以儲歌獨立播放,手機唔駛跟身一樣有歌聽。比較特別嘅係,耳筒內置感應器及心跳Sensor,會自動記錄用戶運動數據,好似練習時間、距離、速度同卡路里消耗等等,當用戶長時間冇做運動,呢對耳筒就會提醒閣下喺時候郁下喇。而新增嘅語音指南仲可以提供即時指導,令運動時更容易達到訂下嘅目標,十足個人健身教練。

專用App:《Gear IconX (2018) Plugin》

售價:待定

查詢:Samsung/3698 4698

Jabra Elite Sport 續航夠爭氣

即使經過兩、三代進化,大部分真無綫耳筒嘅續航力頂盡捱到四個鐘,而Jabra呢款Elite Sport升級版,連續播放時間比較爭氣,可以聽到4.5小時,加埋充電盒嘅9.5小時電力補充,足夠應付全日喺街聽歌。多得內置心跳Sensor,運動時開埋《Jabra Sport Life》App,可以做到即時監測心跳率同運動強度,從而令訓練更有效率。佩戴方面,隨機附送9種不同尺寸及類型嘅耳塞,包括矽膠、耳棉同運動耳翼,大可按喜好或運動類型選擇合適嘅耳塞。

專用App:《Jabra Sport Life》

售價:$2,099

查詢:Jarb3996 9624

EOps NoiseZero WW+ 平價之選

大廠款式閒閒地賣過千蚊,不過市場都有唔少平靚正嘅二綫品牌選擇,好似嚟自本土嘅EOps NoiseZero WW+,每隻耳筒輕到只有4g,但用料交足功課,唔止採用最新一代嘅CSR A64110藍牙晶片,為加強接收穩定性,同時用咗陶瓷天綫技術,大大減低斷綫出現。音色亦都唔馬虎,內置6mm驅動單元同Supreme Bass Acoustic Filter,啱晒鍾意重Bass嘅樂迷口味,聽Pop、Hip Hop真係唔錯。

售價:$499

查詢:Winner Concept/2407 1118

About Jetso King

「頭條Jetso」App網羅「全宇宙」著數優惠及最新消費著數情報;激賞豐富禮品及獨家超筍優惠,易玩易中,送獎贏獎好EASY!

Leave a Reply

Your email address will not be published. Required fields are marked *

%d bloggers like this: