四強混戰 旗艦手機優惠特搜

Browse By

由於全熒幕設計大熱,而家揀手機又多樣嘢考慮,就係要追新款,定係用返傳統169嘅設計。全熒幕好處係畫面實用面積高,譬如6吋嘅全熒幕機款,機身大小實際同傳統5.5吋機款差不多,手感輕巧之餘,由於無咗傳統上下兩條黑色邊框,視覺效果亦相對震㨔。不過因為大部分機面嘅Home鍵飛走咗,解鎖或者用電子錢包時冇咁方便,雖然可以用FaceID、虹膜識別、面孔識別或機背指紋代替,實際用起嚟,反應同方便程度始終唔及Home鍵咁一擊即中。另一個重要因素係全熒幕成本高咗好多,以致新機價錢全部有加無減,先唔講11月初至賣嘅iPhone X入場費要八千幾蚊,就算Galaxy Note8而家最平都要七千蚊,呢啲價位唔係人人負擔得起。要划算選擇唔係無,好似小米MIX 2Vivo X20兩部國產力作,計返都係三、四千蚊港紙就玩到全熒幕,但行貨要畀啲耐性,預計呢一兩個月內會陸續推出市場。

5.99吋小米MIX 2(左)大小跟5.5吋HTC U11(右)相若,可見全熒幕有幾實用。

Vivo X20/X20 Plus會係品牌首度進軍香港嘅頭炮,預計10月中旬推出,售價有望三千有找,算係最抵玩嘅全熒幕新作。

新作開賣全部即減

如果決定咗全熒幕,果粉只好等iPhone X,但到時點先搶到係一大問題。而Android用家眼下最佳選擇當然係Galaxy Note8,可謂將歷代Note系列嘅優點同S8+嚟個完美結合,既有6.3吋超大熒幕,又用到S Pen手寫,效果真係幾正。如果堅持傳統機款,雷聲大雨點小嘅iPhone 8/ 8 Plus無疑係果粉首選,雖然外形只係換咗玻璃機面咁大把,但效能同拍攝表現都提升咗唔少,更重要係唔駛搶機捱炒價之餘,仲可以平幾舊咁入手,簡直係用家多年嚟嘅唯一喜訊。或者真係市況唔太好,其他Android旗艦都面對同一問題,就係甫開賣機價就要減,好似Sony Xperia XZ1,大型連鎖店街統統平六百大元,而定價好進取嘅Nokia 8,機價反而企得幾硬,就算而家出咗一個月,細鋪價錢先減得一兩舊,不過Jetso King一樣有方法搵到可以再平少少。

中移動1cm網站雖然只送$100超市禮券,勝在iPhone 8/8 Plus長期有貨。網址:1cm.hk.chinamobile.com

SmarTone網店訂iPhone 8(256GB)及iPhone 8 Plus一律減$300。網址:shop.smartone.com

《The Club》會員出Nokia 8,可以用500積分當三百蚊洗。

Galaxy Note8回饋Fans

上星期正式賣街嘅Samsung Galaxy Note8,真係叫唔少Fans等到頸都長,始終上年出現咗Note 7事件,好多現役Note系用家真係守足成年先有機換,而廠商為咗回饋呢班忠實粉絲,之前只要喺特約零售商或網絡商買過任何一代Note系列手機,近至Note 7,遠至第一代Note,只要仲有機喺手或喺ClusS完成咗產品登記,咁而家買Note8再上網登記獎賞,就可以獲得$300超市電子禮券、額外多一支S Pen同免費更換手機電池一次,價值超過成千蚊。至於點樣入手,如果可以轉台或加簽合約,當然零機價出機比較着數,雖然部分可能要高用量Plan,但由於補貼較大,實際機價成機會比就咁以淨機買平千多至二千蚊。

售價:$6,998(64GB)、$7,598(128GB)、$8,198(256GB)

查詢:Samsung/3698 4698

Note系列忠實粉絲,入手Note8後可以獲得價值逾千蚊嘅禮券及禮品。

Info

熒幕尺寸:6.3吋全熒幕(2,960×1440)

操作平台:Android 7.1.1

內置記憶:6GB RAM

64/128/256GB ROM

外置記憶:micro SD

電池容量:3,300mAh

體積/重量:162.5×74.8×8.6mm/195g

iPhone 8/8 Plus愈賣愈平

新iPhone甫開賣,先達收機即跌穿官方定價,可謂史無前例,炒家無啖好食,得益當然係真正用家,而家輕輕鬆鬆都可以Walk in入手,去Apple Store買又得,去專門店或連鎖店買又得,上網買仲有優惠添,好似中移動香港網店,無論買邊個型號,邊種容量,淨買機唔駛上台簽約,一樣照送$100超市禮券。而SmarTone網店更大手筆,iPhone 8(256GB)及iPhone 8 Plus全部減$300,加上送Apple Watch 3 $100折扣同免費爆芒換新服務,真係抵過幫襯Apple,弊在網站長期顯示缺貨。至於要大芒有雙鏡頭、玩到專業人像拍攝嘅iPhone 8 Plus,定係細機單鏡頭啱單手操作嘅iPhone 8,真係好視乎個人喜好。如果想玩新增嘅無綫充電,咁就要另外再買無綫充電座,好似Belkin Boost Up或mophie嘅無綫充電座,無論邊款一律承惠$498。

iPhone 8售價:$5,988(64GB)、$7,288(256GB)

iPhone 8 Plus售價:$6,888(64GB)、$8,188(256GB)

查詢:Apple/800 908 988

想試iPhone 8嘅無綫充電,就得額外畀多五舊買無綫充電板。

Info                         iPhone 8                iPhone 8 Plus

熒幕尺寸:  4.7吋(1,334×750)    5.5吋(1920×1,080)

操作平台:                             iOS 11

內置記憶:                         64/256GB

電池容量:            1,821mAh              2,675mAh

體積:            138.4×67.3×7.3mm      158.4×78.1×7.5mm

重量:                        148g                        202g

Xperia XZ1大鋪即減$600

鍾情日系機款嗰種美感,選擇離唔開Sony Xperia XZ1,唔好睇外形好似冇乜變化,就以為單純係XZ Premium嘅細碼版,實在唔止機身細咗輕咗,呢部新作仲係市場上第一部Android 8.0手機,搶先體驗到畫中畫、自動填表呢啲新功能,所用嘅19MP Motion Eye鏡頭,配合自家研發嘅3D Creation功能,可以快速掃描頭部或面部做3D影像。而點樣入手XZ1先係最抵,當然係去大型連鎖店或指定手機鋪出機,因為機價即減六百甚至更多,而且可以攞埋原廠嘅優惠,好似免費Hi-Res降噪耳筒NC750、額外一年保養、半價換手機套同3D頭像打印服務,總值超過千五蚊。

售價:$5,598

查詢:Sony Mobile/8203 8663

Info

熒幕尺寸:5.2吋HDR(1,920×1,080)

操作系統:Android 8.0

內置記憶:4GB RAM、64GB ROM

外置記憶:micro SD

電池容量:2,700mAh

體積/重量:148×73×7.4mm/156g

Nokia 8 The Club限定優惠

新一輪旗艦大戰入面,Nokia 8僅四千元嘅定價確實好進取,雖然5.3吋2K芒唔係新興全熒幕,但機身夠薄夠輕,外形設計幾討好,而最吸引地方喺同Zeiss(蔡司)再續前緣,前後三個13MP鏡頭統統有蔡司光學認證,仲可以利用前、後鏡頭同步影相拍片玩Bothie,甚至一按分享至社交平台玩Live,非常實用。Nokia 8仲有一個獨特功能,就係內置咗Nokia OZO Audio技術,拍4K片時可以360度全景收音,大幅提升音效表現。想上台出機嘅話,只可揀csl.或1010,因為係獨家,如果本身係網絡商嘅《The Club》會員,就可以用500積分加$3,788入手,咁就可以慳返三百蚊。

售價:$4,088

查詢:www.nokia.com

 

Info Nokia 8

熒幕尺寸:5.3吋(2,560×1,440)

操作平台:Android 7.1.1

內置記憶:4GB RAM、64BG ROM

外置記憶:micro SD

電池容量:3,090mAh

體積/重量:151.5×73.7×7.9mm/160g

Leave a Reply

Your email address will not be published. Required fields are marked *

%d bloggers like this: