機王S8駕到 上台出機優惠格到盡

Browse By

 

等到頸都長,喻為新一代機王嘅Samsung Galaxy S8系列,下個禮拜四(5月25日)就會正式開賣,呢部無邊無「掣」嘅矚目旗艦,由外形到手感,處理器以至功能應用均有唔少革新,相信好多讀者已儲定好彈藥。不過入手前,最好睇埋網絡商有乜出機優惠先決定,雖然簽約走唔甩,但部分預訂禮品及折扣優惠,確係連Jetso King都覺得吸引,想知道S8、S8+應該點揀?乜嘢Plan有零機價?大台出機優惠有幾着數,今日就同大家格到盡。

由年頭到依家,市場上都出咗唔少新手機,不過講到外形設計及效能規格,旗艦機嚟講Samsung Galaxy S8系列迴響確係最大,尤其班三星粉絲,因為去年Note 7嘅回收事件,令佢哋差唔多等足成年,終於有部新旗艦畀佢地換機,仲要係第一部用Snapdragon 835處理器,有理冇理都要升級啦。各大網絡商點會唔知呢部機王號召力有幾強,為求搶客,除咗零機價上台出機呢啲指定動作 仲有好多預訂優惠、贈品、額外數據、月費回贈、買機折扣等花招層出不窮,真係睇到人眼都花,趁住仲有成個禮拜新機先落場,依家Jetso King同大家分析下Galaxy S8同S8+邊部適合你,同埋上台出機優惠有乜特別。

5.8吋、6.2吋點揀好

坦白講,雖然Galaxy S8同S8+都可以零機價出機,唔等於一定要出定價較高嘅S8+,實情真係要講用落手感,不妨親身去門市或連鎖店,試下邊部攞上手舒服啲,Jetso King就覺得5.8吋嘅S8大小都恰到好處,由於熒幕用咗18.5:9比例,話係巨芒機身仍然好窄,一手掌握絕對冇問題,至於6.2吋的S8+機身較為修長,有人可能會覺得大部咗啲意,不過除咗4GB RAM及64GB ROM標準版,S8+同時提供地區限定嘅6GB RAM及128GB ROM高配版,機身顏色亦比S8嘅金、灰兩色多咗珊瑚藍同黑色,如果較為着重儲存容量同顏色賣相,S8+應該走唔甩。

S8(左)、S8+(右)賣點之一係首度用上無邊框嘅18.5:9比例2K靚芒,橫向睇片視覺效果非常震撼。

原先只見於Note 7嘅虹膜識別解鎖,終於隨S8系列回歸。

高用量至有零機價

Galaxy S8系列定價分別為$5,698(S8 64GB)、$6,398(S8+ 64GB)及$6,998(S8+ 128GB),基本上各大台都有齊三款型號嘅零機價上台優惠,不過大部分都要選6GB或以上嘅高用量Plan先有零機價,就算3香港可以揀2GB Plan出機,月費講緊$408起跳,且一如以往簽約24個月,同埋選用指定增值服務組合,另留意全部都需要預繳機價$3,000-$6,000不等。就算唔係高用量用戶,冇得揀零機價,但上台出機仍然比自己買機有着數,事關網絡商總有為機價補貼,以3香港用1GB Plan出S8為例,實際總支出都會單單淨上台出SIM同自己買部S8平咗幾百蚊,所以唔係一定零機價先有得諗。

精選配件DeX 瞬間變電腦

今次廠商為Galaxy S8設計咗唔少配件,除咗保護無邊框熒幕嘅機套,另一樣必買嘅配件要數專用Docking──DeX,唔好以為只係一般擴充底座,實在當你將部S8/S8+插咗上去,就可以HDMI連接LCD芒或電視,配合滑鼠及鍵盤在大熒幕工作,由於介面設計十足Windows咁,仲有埋類似嘅「程式集」,可以同時開幾個視窗玩Multi Tasking,十足十桌面電腦,而呢個咁正配件,有啲網絡商會跟出機優惠送埋,有興趣嘅話可從呢個途徑入手。

將DeX分別連接LCD芒、滑鼠及鍵盤,一插上S8就可以瞬間變電腦。

上台出機優惠

新機買一送一 SmarTone

如果本身用開共享數據嘅家庭Plan,咁用SmarTone嘅「超貼心全家享計畫」嚟買機可以攞盡啲優惠,事關佢地有個雙機折扣優惠,如果選用月費$798、最多出5張SIM卡嘅Plan,咁就可5折買最兩部Galaxy S8或S8+,換言之,即係買一送一,如果揀Galaxy S8+,即刻慳咗$6,998,仲要頭6個月送多10GB額外數據畀一家人齊齊用,就算揀6GB或10GB Plan,亦都可以75折或65折買兩部Galaxy S8或S8+,且首6個月送嘅額外數據仲要係Double添。

查詢:2880 2688

SmarTone「超貼心全家享計畫」
月費 數據用量 首6個月額外數據 合約期 雙機折扣優惠
$438  6GB(3 SIMs) 6GB 24個月 75折
$558 10GB(4 SIMs) 10GB 24個月 65折
$798 20GB(5 SIMs) 10GB 24個月 5折

註:須付每月行政費$18。

 

最低成本出機  中移動

相比選用「4.5G全速分享服務計畫(20GB)」及「飛常環球服務計畫(10GB)」零機價出機,中移動另一個「4.5G全速分享服務計劃(3GB)」Galaxy S8優惠換機價計起來其實仲吸引,無錯係要真金白銀畀成$4,988機價,但月費相對比平好多,以$138乘合約期24個月,加埋每月$18行政費,兩年總支出不過$8,742,比起其他台零機價出機總支出大部分過萬蚊咁計,用呢個Plan嚟出Galaxy S8實際慳番唔少,除咗基本嘅3GB數據,合約期內每月送多3GB,如果只求用最低成本出機,真係可以考慮。

查詢:2945 8888

中移動4.5G全速分享服務計畫(3GB)

月費 $138
數據用量 3GB + 3GB(每月額外獲贈)
行政費 $18
合約期 24個月

註:須5月31日或之前攜號轉台。

 

配件厚禮多  3香港

除咗零機價作招徠,3香港仲用一大堆禮品嚟吸引用戶上台出機,依家無論選用最貴或最平個Plan,只要預訂Galaxy S8或S8+,即送fFLAT5 Forte Two耳筒或Aria One藍牙耳筒,仲有原廠摺疊式無綫充電座及10,000mAh流動充電器,單係呢三樣嘢價值已達$1,946,如果再加簽合約,視乎月費計畫由1個月至7個月不等,簽短啲就可免費攞走Gear VR連動態控制器套裝(價值$1,098)或Dex行動工作站(價值$1,098),簽長啲則攞到2017年版Gear 360(價值$2,098)。值得一提嘅係,如果帶號碼轉台,每月會多送1GB額外數據。

查詢:1032

3香港Galaxy S8/S8+月費計畫
月費 $298 $408 $498 $638
數據用量 1GB 2.5GB 6GB 10GB
Galaxy S8上台價 $1,680 $0 $0 $0
Galaxy S8+(64GB)上台價 $2,080 $0 $0 $0
Galaxy S8+(128GB)上台價 $2,680 $0 $0 $0

註:須簽約24個月,並繳付每月行政費$18及選用$39或以上指定增值服務組合。

 

預訂送機票 1010

近期狂谷The Club會員獎賞嘅1010及csl.,預訂Galaxy S8/S8+及零機價出機嘅優惠當然有得揀Club積分,前者送14,000積分、「拍住賞」$100儲值額及Samsung 5,100mAh快速流動充電器,後者則送8,000積分、「拍住賞」$100儲值額及C-Safe手機防盜器,如果1010用戶唔想要咁多Club積分,可以再㨂新加坡經濟客艙來回機票兩張同2,000積分,真係又有新機用,又有得飛去玩,精明嘅你應該會知點揀。除咗上述優惠,用戶仲會有額外月費回贈,合約期內可以慳番$10-$40不等。

查詢:csl./2888 2123          1010/2988 1010

1010「450速」月費計畫

月費

$557 $697
數據用量 6GB 10GB
Galaxy S8上台價 $0 $0
Galaxy S8+(64GB)上台價 $0 $0
Galaxy S8+(128GB)上台價 $0 $0

註:須簽約24個月,並繳付每月行政費$18及選用$39或以上指定增值服務組合。

 

csl.「450速」月費計畫
月費 $498 $638
數據用量 6GB 10GB
Galaxy S8上台價 $0 $0
Galaxy S8+(64GB)上台價 $0 $0
Galaxy S8+(128GB)上台價 $0 $0

註:須簽約24個月,並繳付每月行政費$18及選用$39或以上指定增值服務組合。

 

About Jetso King

「頭條Jetso」App網羅「全宇宙」著數優惠及最新消費著數情報;激賞豐富禮品及獨家超筍優惠,易玩易中,送獎贏獎好EASY!

Leave a Reply

Your email address will not be published. Required fields are marked *

%d bloggers like this: