靚聲跑住聽 無綫運動耳筒特搜

Browse By

有綫定無綫,你點揀?唔係講緊大家睇電視嘅習慣,而是更為貼身、行街食飯搭車都要戴住嘅耳筒。之前Jetso King堅持用有綫耳筒,不過隨住近年運動時間多咗,啲新款手機又好似夾埋咁將啲3.5mm插口飛走哂,諗過度過,無綫耳筒確係方便得多,且可以一次過解決上述問題,唯一要考慮就係揀邊款,實在今年啲無綫耳筒真係出極都出唔完,掛頸嘅又有,真無綫嘅又有,標榜高音質嘅aptX HD及LDAC又有,逐對試唔係辦法,依家Jetso King就幫你按唔同用途分類,覺得啱自己嘅就對號入座。

3.5mm被Out 焗住用

藍牙耳筒好,無綫耳筒又好,其實推出市面大大話話有成十年,由外形、功能到技術,都經歷咗唔少轉變,但一直唔太流行,大概是習慣問題,直至Apple iPhone 7去年狠心將大家熟悉嘅3.5mm插口飛走,不少大廠即時仿傚,新款大作如HTC U Ultra、Samsung Galaxy S8、小米6都再見唔到呢個圓形插孔,雖然跟機會送返一對配有lightning或USB-C插頭嘅耳筒,問題手機得番一個窿,插咗耳筒就唔可以充電或駁電腦過檔案,面對呢個二揀一嘅情況,好多時唯有犧牲聽歌嘅樂趣。而大部分用戶如Jetso King,就覺得呢個設計非常之唔方便,要知依家啲手機幾快冇電,出街時成日插住尿袋,點可能因為叉電聽唔到歌,仲要如果跟機嗰對耳筒啲聲唔啱自己,要換私家耳筒又得加多條轉接綫,所以迫於無奈,十個有九個用戶忍唔住,索性轉用無綫耳筒,雖然要叉多樣嘢,但諗起唔駛爭個插口用,真係輕鬆好多。

運動功能貼心

除咗Apple嘅推波助瀾,另一個令無綫耳筒忽然爆紅嘅原因,就係多得全民運動及健身熱潮帶動,忽然多咗人玩長跑同健身,一個人漫無目的跑幾公里,又或喺健身室做幾兩個鐘Gym,呢個時間唔搵啲歌調劑下真係會悶死,而做運動時周身郁,最怕有綫耳筒揈嚟揈去,所以大家一窩蜂咁追求無綫耳筒,而廠商睇準機會,開發一大堆針對運動用途嘅設計,防水不在話下,部分又可以追蹤心跳,甚至以語音提示幫你訓練,一班運動迷見到咁鬼多功能,戴住呢啲耳筒好似會跑快咗,點會唔爭住畀錢。但選擇時,要記住防水唔等於防汗,尤其運動時郁啲都會滿頭大汗的用家,耳筒長時間被微酸性嘅汗水整到濕一濕,好易入到裡面侵蝕底板,就算防水幾勁都冇用,所以自問大汗的話,最好揀啲有埋防汗保護嘅款式,同時勤啲清洗耳筒。

True Wireless隱藏小問題

講起無綫耳筒近年最大改變,當然係設計上一分為二的True Wireless款式出現,耳筒做到好似兩粒耳塞咁輕便,就咁塞入兩邊耳仔就搞掂,最為人熟悉當然係Apple嘅AirPods,就算接受唔到呢種「刷頭」造型,市面仲有好多見得人嘅款式,不過要留意True Wireless有一常見問題,就係左、右聲道之間容易斷綫,即係聽聽下得番一邊有聲,要等兩者重新連接先變返立體聲,看似小小瑕疵,但斷綫老是常出現,好容易搞到無哂Mood聽落去,目前真係話百分百冇呢個問題嘅款式唔知多,想追求True Wireless嘅冇綫纏繞同束縛,入手前一定要認真考慮。仲有就係注意聽歌嘅航續力,話哂耳筒咁細,電池容量大極有限,有時兩、三個鐘就玩完,就算大部分有充電盒跟身,但用得密一日充幾次,未必人人接受到。

除咗iPhone 7,HTC U系列也飛走了3.5mm插口。

部分無綫耳筒App提供豐富運動功能。

防水唔等於防汗,選購時也要考慮運動用途大唔大。

Tips

佩戴舒適:雖然依家無綫耳筒大都做得好輕巧,但輕巧唔代表戴得舒服,始終每個人耳形唔一樣,就算附送耳鈎、耳翼一類配件,如果唔夾耳形嘅話,戴得唔穩陣,做運動時好易跌,又或行行下都甩出嚟,真係攞嚟搞,所以選擇時最好親自去鋪頭行一陣,試聽比較音色之餘,仲要感受一下,睇下邊款戴得最舒服及穩陣至好。

耳筒本身戴唔戴得穩,同戴得舒唔舒服真係好重要。

編碼技術:以目前藍牙技術而言,無綫聽歌音質無可能做到有綫嘅效果,當中總要有啲犧牲,不過在無綫耳筒中,亦有支援傳輸率較高的靚聲編碼技術,常見嘅有aptX,音質再好啲仲有aptX HD及LDAC,但款式選擇唔多,同時要手機都具備相關技術,所以真係揀靚聲無綫耳筒前,要睇下自己部手機有冇兼容呢幾種技術,有嘅當然可以要求高一點,冇嘅話買咗返嚟都冇用武之地。

如手機支援aptX HD或LDAC編碼,不妨買番對應嘅無綫耳筒,音色靚好多。

 

耳筒推介

Forza Metallo Wireless真防汗

自問大汗一族,揀無綫耳筒唔單止睇防水有幾強,仲要睇埋防汗保護夠唔夠。V-MODA Forza Metallo Wireless就因應汗夜的高鹽分及微酸性,容易造成耳筒損壞,特別加入咗三重保護,包括防水外殼、納米塗層同特製保護層,由外到內隔絕汗水入侵,更用上TrapLock穩定鎖設計,令頸背的接綫緊扣喺肩頸位置,唔理你點跳點郁,都戴得穩穩陣陣。售價:$1,460,查詢:3620 3123

 

 

AirPods果粉首選

如果你唔介意Apple AirPods嘅造型,呢對True Wireless無綫耳筒確係iPhone 7用家嘅首選,事關內置嘅光學及動態加速感應器,可以配合耳筒的W1晶片自動感應喺咪戴咗上去,除低耳筒就會停,戴返又繼續播歌,仲可以敲兩下外殼啟動Siri,叫Siri幫手飛歌同校大細聲,加上可直接用埋Apple Watch揀歌,行街聽歌連手機唔駛拎出嚟,簡直係iPhone 7嘅最佳享樂伴侶。

售價:$1,288

查詢:www.apple.com/hk

 

The Dash入水能游

大熱天時想一邊游水一邊聽歌,唔係冇可能,Bragi The Dash最大賣點就係可以戴住游水,而且左、右耳筒之間喺透過NFMI技術連接,唔受藍牙影響,所以游緊水仍然可以播放內置4GB容量儲存咗嘅歌曲,絕對係市面上第一款入水能游嘅無綫耳筒,仲有佢嗰專用App加入咗針對游泳的監察功能,轉塘同呼吸次數一一記錄哂,功能好全面。售價:$2,498,查詢:LRT/2395 3913

 

 

XB80BS低音強勁

香港人聽乜嘢歌都鍾意講Bass,Sony MDR-XB80BS就啱哂口味,事關耳筒會配合音樂調整到最佳節拍(每分鐘120至140拍),以節拍強勁嘅重低音令閣下做運動時更加起勁。由於附有大型耳掛,做運動唔怕甩出嚟,同埋有IPX5防水保護,雖然賣相粗獷咗啲,但同時支援aptX及DLAC兩種編碼技術,如果你部手機兼容到,咁就可以享受近乎CD嘅靚聲。售價:$1,180,查詢:Sony/2345 2966

 

HBS-1100 24bit直送

時下唔少樂迷已趕上Hi-Res潮流,聽緊24bit嘅FLAC,甚至DSD,想用無綫耳筒都保持番24bit嘅原汁原味,可以考慮LG TONE Platinum HBS-1100,採用apt-X HD編碼技術,支援高清格式嘅24bit/48kHz音檔,Bit-rate提升至576kpbs,動態延伸廣闊,音色比起aptX提升唔少。假如你咁識貨用緊LG G6、G5或V20,又或Onkyo GRANDBEAT手機聽歌,呢款耳筒完全可以將24bit音樂直送到你耳邊。售價:$1,498,查詢:LRT/2395 3913

About Jetso King

「頭條Jetso」App網羅「全宇宙」著數優惠及最新消費著數情報;激賞豐富禮品及獨家超筍優惠,易玩易中,送獎贏獎好EASY!

Leave a Reply

Your email address will not be published. Required fields are marked *

%d bloggers like this: