睇ViuTV唔只你同我 大台人自己都喺公司睇

Browse By

ViuTV開台,難得香港人有多個選擇,Polly我梗係日睇夜睇啦,雖然ViuTV自製劇暫時仲係得《瑪嘉烈與大衛 綠豆》,但一套外購劇《太陽的後裔》已經令到大台收視大跌,連洪永城擔正嘅《在那遙遠的地方.古巴篇》收視最低得18點。

其實睇ViuTV又唔只我同你,有喺大台工作嘅朋友同我講,話連佢哋自己人,都喺公司入面睇新台,始終「知己知彼」嗎,大台亦於星期一推出OTT服務「myTV Super」,Polly我睇完昨晚如年度Sales Presentation一樣的陣容,製作認真,連我都想讚讚,同樣睇得出大台對呢個新平台好有信心亦都好肯掟錢,唔知送俾員工嗰個5GB myTV Super SIM卡又鼓唔鼓勵到自己人,唔睇新台睇返自己個經典台呢?

收視方面,大台收視全部跌,當中平日黃金時段,《愛回家.八時入席》平均收視23點,同《殭》一樣,至於《末代御醫》則有21.8點,全個星期得《新聞透視》升,其餘收視平均跌1.2點;當中十點半檔期最犀利,跌得犀利呀,由《Do姐有問題》平均有超過25點收視,一跌就跌到而家得18.6點,大台今次又有咩解釋先?ViuTV方面,有公關就八俾我聽,話要等五月先知道真正收視係幾多,但同日都有好消息,就係上星期ViuTV嘅串流收看量,包括官方網站及流動應用程式已超過880萬次。

Leave a Reply

Your email address will not be published. Required fields are marked *

%d bloggers like this: