4K電視入手門檻創新低?!

Browse By

自從電視由大牛龜進化至超薄平面,畫面解像度愈嚟愈清,先由高清跳到全高清,依家講緊4K當然就係超高清喇。唔少人印象中4K電視又大又貴,事實啲旗艦型號、百吋巨無霸仲賣得好貴,但入門型號就屢創新低,三、四千元有交易已經唔係新聞,如果依家要升級電視,Jetso King點都會揀4K機款,平平地再加多部Xbox One S遊戲機,咁就可以睇戲打機都有超高清效果,又或者經Apps無綫串流煲美劇,駛乜逼住自己日對夜對大台啲膠清劇。

遊戲機兼做Player

4K電視(解像度3,840×2,160)無錯推出咗好幾年,但普及程度真係唔太理想,除咗機價長期高居不下,另一係原因係無乜Source,買咗部電視都唔知搵乜嚟播,又係睇番免費台或藍光影碟,點會令用家有升級意欲?不過近幾個月情況唔同咗,唔單止有4K畫質既UHD藍光碟登場,就連播放機都忽然多咗選擇,唔似之前想搵部機播碟睇下都無,依家花二千幾蚊入手Xbox One S,打機有4K之餘,仲可以入埋隻UHD藍光碟去睇,加上入門4K電視不斷劈價,要電視加Player全套升級,最平唔使六千蚊搞得掂。

串流睇片最方便

隨着OTT網絡電視興起,今時今日要部4K電視有用武之地,唔一定要額外買Player同實體碟嘅,好似Jetso King咁之前都Joint咗《Netflix》,如果部電視係行Android TV平台,直情喺電視Login,就可以串流咁睇4K超高清畫質嘅美劇或荷里活猛片,就算你部4K電視無得直接裝App,簡單加裝一個Chromecast接收器,都可以將手機App啲片搬到大熒幕。當然,除咗《Netflix》一類,安裝樂視或TVB既機頂盒,一樣搵到唔少4K內容。

講咗咁多,Jetso King之所以有衝動升級4K行列,除咗唔駛再煩搵Source嘅問題,最大原因當然係入場門檻平咗好多,真係幾千蚊大把選擇,仲要唔少款有理HDR呢個新功能,而且尺寸仲係40吋至50吋啱哂一般五、六百呎單位,50吋至60吋個啲真係太大部,唔係人人入到櫃上到牆。如果成日用部電視嚟打機睇戲,確實值得升級4K,就趁依家平價入手,早買早享受。

從圖可見,紅色部分代表4K,畫面解像度足足是1,080p全高清的四倍

唔少入門機款內置咗新興HDR高動態對比功能

 電視點揀好

講到揀電視,亞洲高清協會會長李柏權(Alan)就話依家新一代4K電視畫質好咗好多,就算入門型號都有明顯進步,基本上買番嚟唔使點再Tune,要考慮嘅係電視尺寸,一般最佳觀賞距離係畫面尺寸嘅1.2倍,即40吋電視與沙發距離最好係1.2米。至於介面操作最好就人一目了然,容易上手,同埋如消委會所講留意保養期,建議起碼要一年以上的保養。

串流Apps選擇多

依家要搵4K影像喺電視播,最直接當然係買UHD藍光影碟,不過片種選擇唔多,價錢亦偏貴。唔想洗錢當然可以上YouTube慢慢,但大部分都唔係睇風景就係啲試片,試得兩試真係無哂興趣片。揀來揀去,要有4K畫質劇集或電影可以長期煲,都係畀月費睇《Netflix》、《Amazon Prime Video》或者樂視超級影視組合最可行,前者月費$93,Amazon首6個月只需2.99美元,樂視就$588睇足一年。

《Netflix》及《Amazon Prime Video》均提供4K畫質嘅劇集及節目,月費唔算貴

入門推介

樂視Super4 X43 Pro

唔好以為HDR高動態對比呢啲新功能,只係貴價機嘅玩意,查實入門機款一樣有得玩,好似樂視(LeEco)呢部43吋4K電視Super4 X43 Pro,超薄機身外形唔差,價錢仲係同級最平,又支援4K HDR功能,畫質有番咁上下,加埋用上新一代處理器Mstar 6A930,針對4K影像既Ultra-VDEC解碼能更加強,配合3GB RAM及16GB ROM,運行自家EUI 5.8操作平台,操作都好流暢。依家網上訂講,除咗指定既一個月樂視超級影視服務及一個月超級體育組合加強版,隨機還加送Leme 2藍牙耳機,性價比高。售價:$3,699   查詢:hk.lemall.com 

Samsung 40KU6300

所謂遲買平幾舊,Samsung呢款40吋4K電視40KU6300,由去年推出至今快近一年,機價足足平咗四分一,唔駛五千蚊買到三星機款,點講都吸引,何況話就話係入門,有齊哂PurColour純淨色彩技術及HDR功能,仲有高速處理性能,從軟件着手全面提升畫質,將畫面分成多個區域進行獨立分析及調校,無論色彩、亮度或清晰度都經過優化,畫質絕非二、三綫機款可比,還有Upscale倍線功能,可以將高清或全高清影像倍線至4K水平,同時消除訊噪,整體效果出色。售價:$4,580   查詢:英京影音/2391 5331

Sharp LC-40S3H

平價入門一樣有日系機款,Sharp LC-40S3H都係40吋,內置四核心處理器及自家S3H系列智能中央處理器,令處理影像性能更快更強,畫質自然同步提升。比較特別嘅係,佢行Android 4.3操作平台,除咗可以喺Sharp應用商店下載唔同類型Apps,仲可以直接安裝APK檔案,換言之,就算喺自家商店搵到想要嘅Apps,都可以自行下載抄喺USB手指,再插入電視安裝,譬如《Netflix》、《myTV Super》呢一類都可以裝入電視,隨時開Apps煲劇都無難度。售價:$4,380    查詢:www.fortress.com.hk

LG 43UH6100

43吋畫面相對大一啲嘅LG 43UH6100,纖薄機身加上富金屬感嘅邊框,賣相前衞,最啱掛牆可以慳番唔少位。呢部4K電視一樣有最新HDR Pro功能,可以調校熒幕亮度,令影像更鮮明清晰,以及增強色彩效果,由於官方表明支援HDR10規格,玩PS4 Pro遊戲或睇《Netflix》美劇完全可以發揮HDR嘅威力。為咗令色彩更自然逼真,此機加入咗3D色彩配對功能,透過特別演算法,將色彩扭曲減至最低。另外,此機採用webOS 3.01操作平台,操作簡單之餘,仲可以快速切換至《Netflix》、《YouTube》及《Google Play Movie & TV》,即時收看4K內容。售價:$4,320   查詢:4K LIFE/8100 1877

 

Leave a Reply

Your email address will not be published. Required fields are marked *

%d bloggers like this: