兵仔爭埋單爭輸咗 女神埋單$1842露真面目

Browse By

食飯埋單永遠係男女關係課一門討論不完嘅課題。曖昧期、熱戀期、結婚後等不同時期嘅關係都會影響邊個埋單,同埋幾多。好多時女方理想當然地覺得男方應該埋單,因為男仔好似喺段關係入面擔任一個照顧者嘅角色,自然期望佢經濟能力比較高啦。但係男仔又會覺得下下都要佢俾咁咪好快乾晒塘?

今次故事嘅男女主角係一隻兵同女神嘅關係。話說兵好不容易等到女神分手,就狗衝去約佢食飯撫慰佢受傷嘅心靈啦。成程本身都幾開心嘅,但到埋單一刻,巴打就見真章,女神嘅真面目出晒嚟。

———————–

等到女神分手,我終於搵到機會同佢食飯,成程都幾開心,去到埋單時女神既真面目 出曬黎…

話說女神同佢男朋友分左手,唔多開心,想搵人陪食飯傾心事,呢d好機會,我更係隨傳隨到啦!終於比我等到女神最脆弱既一刻!我企係地鐵站到等佢,好緊張。等左半個鐘,女神終於來到。

女神: 呀忠呀,之前次次食飯都係你埋單,不如今次我請你啦

我: 唔好啦,今次我book間餐廳有D貴呀,你下次先再請啦

你估我真係傻架咩。女仔話唔駛你埋單即係叫你埋單,唔駛你送番屋企即係叫你送。咁簡單的道理我會唔明咩?

我: 真係唔得,今次book果間餐廳有D貴呀,你下次先再請啦

女神: 你次次都咁講既,差左你好多次啦

我: 但係今次真係好D貴喎….

女神: 我可以去撳錢嘛

我心諗,女神咁堅持,唔通真係想埋單?

女神: 不過附近都好似無ATM喎…

我神經反射咁答左句:港鐵站入面咪有囉,銀通 同HSBC都有

女神猶疑左半秒。

女神: 哈哈,係喎,我去按錢先

我知自己衰懶醒,柒左,一睇就知女神扮哂野唔想買單,搵個藉口姐,不過唔緊要,最後只要我搶張單來埋就得啦。

撳完錢後,我同女神入左去西餐廳到坐。間餐廳都算係高檔餐廳,全部侍應都係果d 講英文既尼泊爾人,一餐一個人最低消費都要六七百。女神望住個餐牌,皺起眉頭。哈哈,我一早估到女神睇唔明餐牌的英文,所以我先特登帶佢黎!於是我好man咁講。

我: 不如等我來叫。

女神: 其實我都唔係好食肉,叫D沙拉都ok架啦

我: 剩係食沙拉?

女神: 夠架啦,我食左少少左野過來,同埋今餐…好似有D貴

我: 都話我請你囉,唔好同我計住計住

女神立即放鬆起來。

女神: 哦,哈哈哈,其實我食少少肉都ok嘅

呢一刻,我發現女神都不過係一名港女,不過唔緊要,我就係愛佢既姿色!

我: 咁好啦,不如叫ltalian seafood soup , Garden salad, Main course 要Rosemary lamb chop , Angus T-bone medium ,甜品食完先叫OK?

女神: 好呀!

我望住女神個樣,我就知道我係佢心中既地位已經拋離左d MK 仔啦

12932834_791145997696474_7850439936181009889_n

成餐飯女神都好開心,邊食飯邊我同講心事。食埋甜品之後,女神望住我笑。笑得好甜,係E一刻,我覺得我擁有左全世界。

女神: 平時我D朋友都唔會帶我來呢D餐廳食,多謝你呀

我: 你開心就得啦,係呢,都差唔多啦,不如賣單我送你番屋企啦

女神:嗯

我係褲袋拿出銀包,拎出我張infinite VISA 卡,遞手叫侍應來埋單。女神嘟起小嘴。

女神: 都話今餐我埋單囉

我: 今餐真係有D貴呀,不如下次食飯先你請啦

女神: 唔好啦

女神再嘟起可愛的小嘴,令我開始招架唔住。

我: 你真係想請?

女神: 俾我請啦

佢做咩要求我? 唔通佢真係想埋單? 但如果我搶左來埋,佢會唔會嬲左我架。覺得我好大男人,一d 都唔玩得?

E個時候侍應走過來,遞左張一千八百四十二蚊的單俾我。價錢係我預計之內。女神係呢一刻都未見到張單。

女神:比我埋啦,我話左請你架MA

我呢一刻仲諗緊應唔應該幫佢埋

女神:拿,你唔比我埋,我嬲你架

既然女神堅持到咁,我都諗唔到有咩理由要爭住埋。可能佢屋企都好有錢,或者佢未肯定我,唔想受我太多思惠,咁又係,我唔係佢男朋友,一陣我請左佢,可能佢驚比人話佢收兵,影響佢形象,咁諗都岩既。

女神:我頭先係ATM

女神話口未完,我好自然咁推左張單俾女神。我明白男人唔可以太多猶豫不決!

女神望住張單,再望住我。

我: ?

但見女神面色一沉,佢遲疑左3秒,呢3秒鐘,我覺得好似過左半個鐘咁耐,發生咩事? 佢比賈克斯定左身呀? 我感覺到間餐廳的人都靜左望住我地。好似成個餐廳既人都用左金身,我來唔切反應,女神已經係袋到拎出銀包,再拎出一千六百蚊加一堆廿蚊….

係…正確黎講係一堆廿蚊加d 散銀

我:…

女神左計右計

女:有無四十蚊可以借比我?

呢一刻我內心得一句:碌柒啦…

我遞上左五十蚊比女神

女神: 其實都唔係好貴姐

我: 哈哈…多謝你呀

侍應找番八蚊過來時,女神仲好霸氣咁講。

女神: 唔駛啦

離開餐廳之後,我地兩個再無傾過計,去到港鐵站,女神話有d野做,走先。

呢句「走先」後,我就再搵唔到女神

而我果50蚊,都係收唔番。

———————————-

男小編:
其實點解個女神要不斷堅持要埋單啫?如果唔想俾咪係咁咦講兩句扮晒嘢咪算囉,又要威又要帶頭。真係唔明你哋啲女人,做人咁矛盾唔辛苦咩?個男仔又唔係唔想俾,只不過見女神咁堅決咪讓下佢囉,點知原來女神表裏不一,想俾又唔想俾。計我話,呢個結局係最好的,呢啲女一齊咗真係煩死,一日到黑都要估估估,細胞都死多啲。

女小編:
可能女神真心想俾呢,不過無諗過會咁貴。巴打你又係,第一次食飯點可以要女神埋單呢?你應該要堅持到底。最後嘅底線應該係AA制,而唔應該要女神俾全數。大部分女仔都會鍾意有少少霸道,有少少氣勢嘅男人,咁先食得住自己。就好似《流星花園》入面個道明寺咁,霸氣得嚟帶點溫柔。而今次呢個故事嘅男主角就唔夠man啦,女神講多兩講就讓步,太柔弱,難怪女神會失望囉,所以先唔想同你講嘢。我覺得女神失望唔係全部因為錢,而係有諗住同巴打發展,不過從埋單呢件事上面覺得巴打你唔係佢想搵嘅人,所以突然失去興趣。你哋唔好諗到女人咁現實先得㗎?

One thought on “兵仔爭埋單爭輸咗 女神埋單$1842露真面目”

  1. 路人甲 says:

    其實有時男人應該要霸道點,決斷少少。
    我有時都同女朋友講 其他野可以比你話事,唯獨哩件事你無得選擇! 聽我話

    佢又受…….

Leave a Reply

Your email address will not be published. Required fields are marked *

%d bloggers like this: